Julian Alvarezi e ‘distancon’ veten nga bisedimet me Barcelonën

Sport

Gazeta Express

12/12/2025 18:40

Ylli i Atletico Madridit, Julian Alvarez, është lidhur disa herë me Barcelonën gjatë muajve të fundit, por fituesi i Kupës së Botës ka siguruar se është plotësisht i përqendruar te klubi i tij aktual. Barça po kërkon një pasues afatgjatë për Robert Lewandowskin.

Gjatë verës, Alvarez u përmend si një nga objektivat kryesorë të Barcelonës, madje si opsioni i preferuar i presidentit Joan Laporta.

Agjenti i tij la të hapur mundësinë e një transferimi në vitin 2026, por së fundmi është raportuar se katalanasit e kanë ftohur interesimin.

Në një intervistë për “Marca”, Alvarez pranoi se është i vetëdijshëm për zërat.

“Shiko, nuk më bezdis. Mundohem të mos i kushtoj shumë vëmendje, por e di se çfarë thuhet. Është kudo në rrjete sociale. Mendoj se ka më shumë zëra online sesa ndonjë gjë konkrete. Jam shumë i fokusuar te kjo sezonë, te ajo që kemi përpara me Atletico Madrid. Prandaj përpiqem t’i filtroj këto gjëra dhe të mendoj për veten, për të vazhduar të rritem si lojtar dhe për të fituar”, tha ai.

Ndërkohë, një tjetër lojtar që Atletico ndoqi gjatë verës ishte mbrojtësi i Tottenham Hotspur, Cristian Romero, bashkëkombës dhe shok skuadre i Alvarez në kombëtare.

Ai konfirmoi se kanë diskutuar për një lëvizje të mundshme.

“Po, po. Sigurisht që do të më pëlqente të ndodhte, sepse Cuti është një nga mbrojtësit më të mirë në botë. Kalojmë shumë kohë bashkë në kombëtare dhe mendoj vërtet se ai është një yll, një konkurrues i ashpër, shumë i fortë në mbrojtje. Po, pata disa biseda me të dhe për disa detaje nuk u realizua, por shpresoj që një ditë të luajmë bashkë”, shtoi ai.

Sezoni i kaluar, Atletico ishte në garë për tre trofe deri në mars, por brenda një muaji ëndrrat u shuan. Sulmuesi argjentinas analizoi fundin e sezonit të kaluar.

“Po, mendoj se të gjithë bëjnë bilanc. Por siç e thashë, në ato muajt e fundit kur gjithçka vendoset, janë detajet ato që bëjnë diferencën. Vitin e kaluar kishim disa ndeshje në ligë ku humbëm pikë të cilat na nxorën nga gara për titull. Pastaj në Champions, të gjithë e dimë çfarë ndodhi. Në Kupë, humbëm në gjysmëfinale, por konkurruam mirë. Janë pikërisht këto gjëra të vogla që vendosin”, vazhdoi Alvarez.

Apollo së fundmi është bërë investitori kryesor i Atletico Madrid, në një marrëveshje që vlerëson klubin në rreth 2.5 miliardë euro.

Ndërsa klubi kërkon të rritet, si Diego Simeone ashtu edhe drejtori sportiv Mateu Alemany e shohin Alvarez si figurën kryesore të këtij projekti. Vetë Alvarez foli pozitivisht për drejtimin në të cilin po ecën Atletico.

“Po, mendoj se sot jemi në pozicion të konkurrojmë me këdo, dhe siç e thashë më parë, klubi ka bërë hapa të mëdhenj. Në këtë merkato kemi sjellë shumë lojtarë me cilësi të lartë, dhe besoj se në të ardhmen klubi ka ende hapësirë për t’u përmirësuar”, përfundoi argjentinasi./GazetaExpress/