Zgjedhjet e 28 dhjetorit: Votimi do të organizohet në 50 përfaqësi diplomatike dhe në 10 qendra shtesë

Lajme

Gazeta Express

26/11/2025 17:05

Sot Komisioni Qendror i Zgjedhjeve ka vendosur që të miratojë propozimin e MPJD’së për qendra shtesë të votimit jashtë përfaqësive diplomatike.

Bëhet fjalë për 10 sosh: Gjermani 5; Zvicër 3, Mbretëri e Bashkuar 1 dhe ShBA 1.

“Po ashtu, sipas vendimit të KQZ-së, Qendra të Votimit do të hapen edhe në hapësira shtesë, jashtë përfaqësive diplomatike, sipas propozimit nga Ministria e Punëve të Jashtme dhe Diasporës. Lokacionet shtesë përfshijnë 10 Qendra të Votimit (Gjermani 5; Zvicër 3, Mbretëri e Bashkuar 1 dhe ShBA 1) me gjithsej 43 vendvotime dhe me numër maksimal të votuesve që mund të regjistrohen për të votuar 40,850 votues.”

Sipas vendimit të KQZ-së, procesi i votimit planifikohet të organizohet në 50 përfaqësi diplomatike me gjithsej 66 vendvotime, të vendosura në 36 shtete të ndryshme të botës.

“Megjithatë, kjo listë do të mund të rishikohet nga KQZ, varësisht nga numri i votuesve që do të regjistrohen për të votuar në përfaqësi diplomatike. Gjithashtu, KQZ caktoi numrin maksimal 950 votues që mund të regjistrohen për të votuar në një vendvotim në përfaqësi diplomatike. Sipas vendimit të KQZ-së, numri maksimal i votuesve që mund të regjistrohen për të votuar në këto përfaqësi diplomatike është 62,700 votues.”