Buffoni i fajëson politikanët për rënien e futbollit italian

Futboll

Gazeta Express

22/11/2025 8:40

Kreu i Delegacionit të Kombëtares së Italisë, Gianluigi Buffon, ka dhënë një vlerësim të ashpër për krizën e futbollit italian, duke fajësuar dekada vetëkënaqësie dhe natyrën afatshkurtër të klasës politike në vend për vazhdimësinë e problemeve, sipas një interviste të gjerë për Gazzetta dello Sport.

Buffon iu rikthye deklaratës së tij të famshme pas Botërorit 2010, kur kishte paralajmëruar se vështirësitë e kombëtares sapo kishin filluar. Ai kujtoi paralajmërimin e atëhershëm:

“Gabim e kemi bërë diçka, s’ka dyshim. Por kujdes: pas disa vitesh do ta gjejmë veten duke festuar kualifikimet, jo një fitore në Kupën e Botës.”

Ai shpjegoi se kjo nuk ishte thjesht profetike, por një vëzhgim realist i situatës:

“E kuptova çfarë po ndodhte, ndryshimet në zhvillim po ndodhnin më shpejt se sa pritej.”

Shtoi se qëllimi i tij ishte edhe: “Të mos i tregojmë vetes histori që nuk ekzistojnë më.”

Buffon bëri një kontrast të fortë mes Italisë dhe rivalëve të saj europianë, duke theksuar se Italia vazhdon të mbahet peng i së kaluarës. Ai tha se ndryshe nga Italia, kombëtaret e tjera të mëdha jetojnë në realitetin e sotëm:

“Problemi është jetesa në dy botë që nuk takohen. Nga njëra anë, në virtyt të historisë sonë, jemi mendjemëdhenj: mendojmë se gjithçka na takon me hir hyjnor.”

Ai vazhdoi: “Franca ka qenë ekip i madh për tridhjetë vjet, Spanja për gati njëzet, ata janë në të tashmen.”

Për Italinë, fajësoi mungesën e planifikimit:

“Rezultatet e sotme lidhen me njëzet vite më parë, kur u bëmë vetëkënaqës për forcën tonë, për Buffon, Cannavaro, Totti. Duke menduar se do të ishte e përjetshme me hir hyjnor. Edhe atëherë, duhej të rimendonim modelet teknike e taktike, por ne ishim cikat.”

Portieri legjendar ishte i drejtpërdrejtë në kritikën e tij ndaj mungesës së vizionit afatgjatë, të cilën ia atribuon presioneve të jashtme. Ai tha se zbatimi i reformave të thella kërkon një vendosmëri që politikanët nuk janë të gatshëm ta marrin:

“Është një zgjedhje e guximshme që politika shpesh nuk e bën, e përqendruar te votat dhe pra te këtu e tani, pa menduar për planifikimin.”

Buffon e mbylli me një parashikim të zymtë për stagnimin e vazhdueshëm të futbollit italian: nëse këto çështje nuk adresohen me stabilitet dhe durim, problemet do të mbeten për gjeneratën tjetër. Ai paralajmëroi intervistuesin:

“E thjeshtë: për dhjetë vjet do të intervistoni një Buffon tjetër në vendin tim, dhe pyetjet e përgjigjet do të jenë të njëjta.”/GazetaExpress/