Donald Trump do të takohet me Cristiano Ronaldon në Zyrën Ovale, së bashku me ‘shefin’ e tij

Futboll

Gazeta Express

18/11/2025 17:29

Donald Trumpi do të presë Cristiano Ronaldon në Zyrën Ovale gjatë një samiti me princin e Arabisë Saudite, Mohammed bin Salman.

Ronaldo, i cili luan për Al-Nassr në Saudi Pro League, po e viziton Amerikën për herë të parë pas më shumë se një dekade, pasi në vitin 2017 u përball me akuza për përdhunim, të cilat ai i ka mohuar gjithmonë.

Mohammed bin Salman po viziton Shtëpinë e Bardhë për herë të parë.

Ai është udhëheqësi i parë saudit që e viziton vendin që nga vrasja e Jamal Khashoggit, gazetarit dhe kritikut të qeverisë saudite.

Z. Trump ka thënë se dëshiron t’i shesë Arabisë Saudite avionët F-35, aeroplanët luftarakë më të avancuar në botë.

Dy liderët pritet gjithashtu të njoftojnë marrëveshje për energjinë bërthamore civile dhe infrastrukturën e inteligjencës artificiale.

Ronaldo, i cili pritet të jetë kapiteni i kombëtares portugeze në Kupën e Botës në SHBA verën e ardhshme, e quajti Mohammed bin Salman “shefin e tij” në një intervistë të fundit.

Ai shtoi se ishte i interesuar të ulej me presidentin amerikan për të diskutuar për paqen botërore.

“Nëse është këtu, ose në SHBA, kudo që ai dëshiron, e di që ai ishte këtu në Arabi me shefin tonë MBS,” i tha ai Piers Morganit./GazetaExpress/