Tottenhami me fitore të madhe, e ‘shkatërron’ Copenhagenin

Futboll

Gazeta Express

04/11/2025 23:19

Tottenham dhuroi një paraqitje ëndërr në Champions League, duke shkatërruar Copenhagen pavarësisht se luajti me dhjetë lojtarë, në një mbrëmje të cilën e ndriçoi një supergol i Micky van de Ven – një prej golave më të bukur të sezonit.

Spurs kaluan shpejt në epërsi me golat e Brennan Johnson dhe Wilson Odobert, duke e vënë ndeshjen nën kontroll, por gjithçka ndryshoi kur Johnson u ndëshkua me karton të kuq pas një ndërhyrjeje të ashpër ndaj Marcos Lopez.

Megjithatë, edhe me një lojtar më pak, Tottenham shpërtheu. Van de Ven, mbrojtësi holandez, mori topin në gjysmën e vet të fushës, kaloi me shpejtësi katër lojtarë të Copenhagen dhe përfundoi me një goditje të jashtëzakonshme, që ngriti në këmbë gjithë stadiumin – një gol që do të mbahet mend gjatë.

Pas humbjes zhgënjyese ndaj Chelsea-t në fundjavë, ku tifozët i kishin fishkëllyer, Spurs u rikthyen fuqishëm. Në pjesën e dytë, Joao Palhinha shënoi golin e katërt, pas një aksioni të ndërtuar mirë nga Cristian Romero, ndërsa Richarlison humbi mundësinë për të bërë 5-0 në kohën shtesë, duke goditur traversën nga penalltia.

Për Van de Ven, ky ishte reagimi perfekt pas polemikës që shpërtheu fundjavën e kaluar, kur kamerat e kishin kapur duke shmangur përshëndetjen me trajnerin Thomas Frank dhe tifozët. Por pas kërkimit publik të faljes, mbrojtësi iu përgjigj në mënyrën më të mirë të mundshme: me një paraqitje madhështore.

Me këtë fitore, Tottenham arrin në tetë pikë në katër ndeshje (dy fitore dhe dy barazime) dhe mban të paprekur statusin e skuadrës së pamposhtur në Champions League. Sfida e radhës do të jetë më 26 nëntor ndaj kampionëve në fuqi, Paris Saint-Germain./GazetaExpress/