Gjuriq e uron Spiropalin për pozitën e re në krye të diplomacisë, përpiqet të thumbojë për Kosovën

Lajme

Gazeta Express

20/09/2025 10:57

Ish-kryeparlamentarja e Shqipërisë, Elisa Spiropali, mori drejtimin e diplomacisë shqiptare në qeverinë e re të Ramës.

Për punën e re të saj për marrëdhëniet me jashtë, Spiropali mori urime edhe nga homologë të saj, përfshirë vendet e rajonit.

Një i tillë i erdhi edhe nga Marko Gjuriq i Serbisë, i cili e uroi atë, por jo pa tentuar të thumbojë për Kosovën, raporton Gazeta Express.

Gjuriq i përmendi asaj “marrëdhënie fqinjësore të mira” mes Shqipërisë e Serbisë, duke tentuar ta fshehë faktin se Shqipëria e Serbia s’janë shtete fqinje, duke e pasë në mes Kosovën.

“Urime për Elisa Spiropali për emërimin si Ministre e Jashtme. Pres me padurim të eksploroj mënyra për të avancuar më tej marrëdhëniet Serbi-Shqipëri përmes dialogut konstruktiv, në frymën e fqinjësisë së mirë dhe lidhjes rajonale”.

Gjuriq u tregua edhe më ‘zemërgjerë’ me shqiptarët, duke e falënderuar ish-kryediplomatin Igli Hasani për bashkëpunimin dhe i uroi “suksese të vazhdueshme” në rolin e tij të ri.

Spiropali ia ktheu me mirënjohje urimin homologut serb, por ia potencoi “partneritetin rajonal” me Serbinë dhe që ai bazohet në frymën e integrimit europian.

“Faleminderit Marko Gjuriq për urimet tuaja të përzemërta. Ndaj angazhimin për të përmirësuar më tej marrëdhëniet Shqipëri-Serbi përmes dialogut dhe bashkëpunimit të vazhdueshëm, në frymën e partneritetit rajonal dhe integrimit në BE”, ka shkruar Spiropali në X.

Me marrjen e detyrës së re, Spiropali u zotua se do ta çojë përpara objektivin strategjik për Shqipërinë Europiane.

Thank you @markodjuric, for your kind congratulations. I share the commitment to further enhancing Albania-Serbia relations through continued dialogue and cooperation, in the spirit of regional partnership and EU integration. https://t.co/94xTjRpxts

— Elisa Spiropali (@elisaspiropali) September 19, 2025