BDI: Kulturës shqiptare në Maqedoninë e Veriut po i mbyllet dera 

Maqedoni

Gazeta Express

24/05/2025 14:08

Bashkimi Demokratik për Integrim ka shprehur shqetësim lidhur me avancimet e fundit të realizuara nga Ministria e Kulturës, ku nga 12 avancime brenda kësaj ministrie, vetëm një pozitë i është dhënë një shqiptari, transmeton Portalb.mk. 

Nga BDI thonë se ky bilanc është tregues i qartë i një politike të vetëdijshme për të marginalizuar përfaqësimin kulturor të shqiptarëve në Republikën e Maqedonisë së Veriut. 

“Për më shumë se një vit, asnjë punësim i ri nuk është bërë në institucionet kulturore të drejtuara nga shqiptarët. Ansamblet kulturore janë në shuarje të plotë, artistët në margjinë dhe institucionet pa jetë, pa investime dhe pa vizion. Ansambli Muzikor është lënë si relikt simbolik, pa mbështetje dhe pa perspektivë”, thanë nga BDI.

Përgjegjësia për këtë situatë sipas tyre nuk i takon vetëm ministrisë, por edhe koalicionit VLEN si përfaqësues të shqiptarëve në qeveri. 

Bashkimi Demokratik për Integrim në vazhdimësi del me reagime publike, ku akuzon koalicionin VLEN për degradimin e pozitës së shqiptarëve në shtet.

Kujtojmë se më 9 tetor 2024, Gjykata Kushtetuese e Maqedonisë së Veriut shfuqizoi mekanizmin e njohur si “Balancuesi”, i cili përcaktonte punësimet në administratën publike sipas përkatësisë etnike, me qëllim promovimin e barazisë etnike dhe përfaqësimin e drejtë të të gjitha bashkësive etnike në institucionet shtetërore. Për momentin, përfaqësimi i shqiptarëve në administratën shtetërore është në një fazë të pasigurtë.

Protagonistët e koalicionit VLEN tash e një kohë të gjatë vazhdimisht dalin me deklarata se është në përfundim procesi i zgjidhjes ligjore për përfaqësimin e drejtë dhe adekuat, që nga shfuqizimi i mekanizmit juridik “Balancuesi”.