Abdixhiku del me propozim pas letrës së Kurtit, kërkon qeveri të tranzicionit

Lajme

Gazeta Express

06/05/2025 14:45

Kreu i LDK-së, Lumir Abdixhiku, ka propozuar një qeveri nacionale të tranzicionit me të gjitha partitë shqiptare deri në zgjedhjen e presidentit të ri.

“Është krizë e thellë institucionale, kryesisht për shkak të dështimit të partisë së parë që të krijojë partneritete politike për krijimin e një shumice”.

Zgjidhjen nga kjo bllokadë, ai tha se LDK e konsideron si “të domosdoshme të rëndësisë nacionale për Republikën e Kosovës” dhe për këtë ai tha se ka një propozim.

“Në përputhje me këtë, LDK dhe unë si kryetari i saj, propozojmë nisjen e një procesi të ri politik dhe kjo zgjidhje kërkon edhe përgjegjshmëri edhe unitet, por mbi të gjitha kërkon dhe vetëdije të lartë politike nacionale”.

“LDK propozon nisjen e këtij procesi, fillimisht konsultativ me të gjitha partitë politike shqiptare me qëllim formimin e qeverisë nacionale të tranzicionit. LDK kërkon unitet gjithëshqiptar në këtë periudhë dhe formimin e qeverisë nacionale të tranzicionet, një qeveri me afat të caktuar deri në zgjedhjen e presidentit të ri”.

Ai tha se kjo qeveri duhet të ketë po ashtu edhe “program e agjendë të qartë shtetare” të politikës së brendshme dhe të jashtme pa dallim dhe mbi të gjitha “krijimin e një atmosfere që edhe e emancipon skenën politike, por mbi të gjitha e edukon skenën politike dhe e shëron polarizimin e tanishëm”.

Paraprakisht, Abdixhiku tha se si parti kanë vlerësuar se s’mund të kenë bashkëpunim me Lëvizjen Veteëvendosje pas ftesës që mori për koalicion.

“LDK për mungesë besimi dhe duke pasë parasysh stagnimin katërvjeçar të vendit për katër vitet e shkuara, e kam fjalën për rrezikimin e aleancave strategjike, sigurisë nacionale, rrezikimin serioz të demokracisë dhe lirisë së shprehjes, atakimin e institucioneve të pavarura kushtetuese, mosrespektimin e vendimit të këtyre institucioneve dhe mbi të gjitha polarizimin e thellë shoqëror e ka vlerësuar të pamundur bashkëpunimin me Lëvizjen Vetëvendosje dhe zotëri Kurtin”./Express/