Rikonfirmon atë që e tha mbrëmë në T7, Aliu: Kosova projekt i përkohshëm deri në bashkim

Lajme

Gazeta Express

01/12/2023 12:22

Ministri i Infrastrukturës dhe një prej njerëzve më të rëndësishëm në Vetëvendosjen e Albin Kurtit, Liburn Aliu, në një intervistë në T7, teksa ka folur për kombin kosovar, ka thënë se e sheh “Kosovën si projekt të përkohshëm”.

Një deklaratë e tij si zyrtar i partisë në pushtet ka nxitur reagime të shumta. Kurti është munduar t’i shmanget përgjigjes kur është pyetur, duke cituar zëdhënësin e Qeverisë se “Aliu e ka thënë në një emision festiv”.

Por pavarësisht kësaj, Aliu në një prononcim të sotëm për Klan Kosova i ka rikonfirmuar edhe një herë ato që ka thënë në T7.

Aliu ka thënë se e sheh Kosovën si projekt të përkohshëm deri në bashkim me Shqipërinë

Top zyrtari i VV-së ka deklaraur se sqarimet tjera do t’i bëjë kur të kthehet në Kosovë.

“E konfirmoj që për mua Kosova, në rrethanën në të cilën është, me Kushtetutë e këto gjëra, është projekt i përkohshëm. Është proces kalimtar drejt bashkimit me Shqipëri. Sqarimet më tej i bëjmë bashkë kur të kthehem në Kosovë”, ka thënë Aliu./GazetaExpress/