Zyrtare: Sesko firmos për Manchester United

Futboll

Gazeta Express

09/08/2025 11:52

Manchester United e ka konfirmuar se Benjamin Sesko i është bashkuar klubit, në pritje të regjistrimit.

Sulmuesi slloven ka nënshkruar një kontratë deri në qershor të vitit 2030.

Gjatë dy sezoneve të fundit, Sesko ka shënuar më shumë gola se çdo lojtar tjetër nën moshën 23 vjeç në pesë ligat kryesore të Evropës. 22-vjeçari realizoi 21 gola dhe regjistroi gjashtë asistime për RB Leipzig sezonin e kaluar.

Ai tashmë është paraqitur 41 herë me përfaqësuesen e Sllovenisë dhe ka shënuar 16 gola që nga debutimi i tij si lojtari më i ri në histori të vendit në vitin 2021.

“Historia e Manchester United është padyshim shumë e veçantë, por ajo që më emocionon vërtet është e ardhmja. Kur diskutuam projektin, ishte e qartë se gjithçka është në vend për këtë ekip që të vazhdojë të rritet dhe të garojë sërish për trofetë më të mëdhenj”, tha Sesko.

“Që nga momenti që mbërrita, ndjeva energjinë pozitive dhe atmosferën familjare që ka krijuar klubi. Është qartësisht vendi i përsosur për të arritur nivelin tim maksimal dhe për të përmbushur të gjitha ambiciet e mia. Mezi pres të filloj të mësoj nga Ruben [Amorim] dhe të lidhem me bashkëlojtarët e mi për të arritur suksesin që të gjithë e dimë se jemi të aftë ta arrijmë së bashku.”

“Benjamin zotëron një kombinim të rrallë të shpejtësisë rrufe dhe aftësisë për të dominuar fizikisht mbrojtësit, duke e bërë atë një nga talentet më të jashtëzakonshme të rinj në futbollin botëror. E kemi ndjekur me kujdes karrierën e Benjamin-it; të gjitha analizat dhe kërkimet tona treguan se ai ka cilësitë dhe personalitetin e nevojshëm për të lulëzuar te Manchester Unite”, tha drejtori sportiv i United, Jason Wilcox.

“Duke punuar nën udhëheqjen e Ruben-it dhe ekipit tonë të performancës, Benjamin po i bashkohet mjedisit të përsosur për ta ndihmuar të arrijë potencialin e tij botëror. Dëshira që të gjithë lojtarët e rinj të firmosur këtë verë kanë treguar për t’u bashkuar me klubin, e thekson qartë joshjen dhe madhështinë e Manchester United, ndërsa ne vazhdojmë të ndërtojmë dhe zhvillojmë një skuadër të aftë për të sfiduar për nderimet më të mëdha.” /GazetaExpress/