Zyrtare: Luka Modric largohet nga Real Madridi

Futboll

Gazeta Express

22/05/2025 16:23

Real Madrid ka konfirmuar zyrtarisht se kapiteni dhe legjenda e klubit, Luka Modrić, do të largohet nga klubi pas përfundimit të Kampionatit Botëror të Klubeve, që do të zhvillohet nga 18 qershori në Shtetet e Bashkuara të Amerikës. Kjo do të shënojë fundin e një epoke të paharrueshme për mesfushorin kroat në “Santiago Bernabéu”.

Klubi i ka shprehur mirënjohjen dhe dashurinë e tij njërit prej futbollistëve më të mëdhenj në historinë e Real Madridit dhe të futbollit botëror. Që nga ardhja e tij në vitin 2012, Modrić ka qenë një nga shtyllat kryesore të një prej periudhave më të suksesshme të klubit.

Gjatë 13 sezoneve, ai ka fituar plot 28 trofe: 6 Liga të Kampionëve, 6 Botërorë Klubesh, 5 Superkupa Europe, 4 La Liga, 2 Kupa të Mbretit dhe 5 Superkupa të Spanjës. Me këtë arritje, Modrić bëhet futbollisti më i titulluar në historinë 123-vjeçare të Real Madridit.

Në aspektin individual, ai ka fituar Topin e Artë në vitin 2018, çmimin “The Best” nga FIFA dhe është shpallur Lojtari i Vitit nga UEFA. Ka qenë pjesë e formacionit më të mirë të FIFA FIFPro në 6 raste dhe dy herë është shpallur mesfushori më i mirë i Ligës së Kampionëve.

Me fanellën e Real Madridit, Modrić ka luajtur 590 ndeshje, duke shënuar 43 gola. Ai ka fituar gjithashtu një Top të Artë dhe një Top të Argjendtë në Botërorin për Klube.