Zjarr në afërsi të Krujës/ Flakët shkrumbojnë hektarë me bimësi, ndërhyhet nga ajri për shuarjen

Shqiperi

Gazeta Express

29/08/2025 13:00

Një vatër e re zjarri është regjistruar sërish në Krujë, në vendin e quajtur Bojë, pranë zonës së guroreve. Flakët kanë përfshirë një sipërfaqe të gjerë me pisha dhe bimësi, duke shkrumbuar të gjithë shkurret në zonë.

Për shkak të terrenit të vështirë, ndërhyrja me mjete tokësore është e pamundur dhe për këtë arsye është kërkuar ndihma e helikopterit, i cili pak më parë është angazhuar për shuarjen e zjarrit.

Burime nga vendngjarja bëjnë të ditur se zjarri është i qëllimshëm, pasi janë konstatuar katër vatra të ndryshme.

Të njëjtat burime shtojnë se dyshohet se edhe zjarret e mëparshme në Krastën e Krujës kanë qenë të qëllimshme dhe se pas tyre mund të qëndrojnë subjektet e guroreve, të cilat dyshohet se po tentojnë të zgjerojnë territorin e shfrytëzimit në kurriz të pyllit.