Zhaklin Lekatari: Armend Rexhepagiqi hapi një diskurs të madh shoqëror

Rozë

Gazeta Express

01/10/2024 10:25

Pas deklaratës së kantautorit të njohur Armend Rexhepagiqi në emisionin “Canapé”, që moderohet nga Shpend Lipa,  ku ai foli për instinktin e babait, aktivistja Zhaklin Lekatari ka reaguar fuqishëm përmes disa videove në Instagram.

Në intervistën e tij, Rexhepagiqi përmendi natyrshmërinë e instinktit prindëror, çka nxiti një debat mbi këtë temë.

Lekatari, e njohur për pikëpamjet e saj, e quajti të rëndësishëm debatin për prindërimin dhe sfidoi nocionet tradicionale që lidhen me rolet gjinore. Ajo shprehu qëndrimin se koncepti i instinktit prindëror, qoftë ai i nënës apo babait, nuk është biologjik, por një konstrukt shoqëror.

“E kam thënë disa herë, jo se nuk ekziston instinkti i babait, por as i nënës. Këto janë konstrukte shoqërore dhe jo biologjike,” u shpreh Lekatari.

Ajo gjithashtu vlerësoi deklaratën e Rexhepagiqit, duke e cilësuar si një katalizator për hapjen e një diskursi të domosdoshëm mbi prindërimin në shoqëritë shqiptare.

“Është një debat shumë i rëndësishëm që ka ardhur koha të bëhet në shoqërinë tonë,” tha ajo.

Për të gjithë ju që nuk e keni dëgjuar deklaratën e Armend Rexhepagiqit, klikoni në videon e mëposhtme. /GazetaExpress/