Zgjedhjet 2025 në Shqipëri/ PS fitoi me +250 mijë vota, mbi 55 mijë fletë “në kosh”, tkurrje e votuesve krahasuar me 2021

Shqiperi

Gazeta Express

14/05/2025 11:25

Procesi i numërimit për zgjedhjet parlamentare të 11 majit ka përfunduar për 5.225 kuti votimi brenda territorit të Shqipërisë, ndërsa vijon procesi për votën e diasporës dhe votat preferenciale për kandidatët, i cili po zhvillohet në Parkun Olimpik “Feti Borova” në Tiranë.

Komisioni Qendror i Zgjedhjeve konfirmoi në mesnatë se procesi i numërimit dhe vlerësimit të votave është përmbyllur për të 12 qarqet e vendit, në përputhje me afatet ligjore. Deri më tani, rezultati flet qartë: Partia Socialiste, e udhëhequr nga Edi Rama, ka siguruar mandatin e katërt qeverisës me një fitore të thellë me 83 mandate dhe mbi 52% të votave në rang kombëtar.

Partia Demokratike dhe aleatët e saj kanë pësuar një rënie të ndjeshme, duke u ndalur në 34.28% të votave, ose 50 mandate, një rënie prej 13 mandatesh krahasuar me vitin 2021. Humbja ishte veçanërisht e thellë në disa prej bastioneve të saj tradicionale, si Dibra, ku PS arriti të përmbysë rezultatin.

Në qarkun e Tiranës, Agron Shehaj siguron 2 mandate, duke i marrë një Partisë Demokratike. Ndërkohë, Partia Socialdemokrate e Tom Doshit ruan 3 mandate me 3.4% të votave.

Koalicioni “Nisma Shqipëria Bëhet” merr 1 mandat me 3.5% të votave, po ashtu edhe Lëvizja Bashkë, e cila me 1.4% siguron një përfaqësues në Kuvend. Partitë e tjera të vogla nuk kanë arritur të kapërcejnë pragun përfaqësues.

Votat e diasporës pritet të luajnë një rol vendimtar në disa qarqe, ndërsa në disa raste kanë ndikuar edhe në ndryshimin e balancës së mandateve. Një mandat i Partisë Demokratike në Vlorë është rrëmbyer nga PS pas përfshirjes së votës së emigrantëve.

Të dhënat e KQZ-së (paraprake):

Zgjedhës në listë: 3.467.962

Votues: 1.458.251 (pjesëmarrje 42.21%)

Vota të vlefshme: 1.402.820

Vota të pavlefshme: 55.334

Në votën e diasporës, e cila është ende në proces numërimi, Partia Socialiste gëzon gjithashtu mbështetje me rreth 54% të votave, përkundër 29% që ka marrë PD me aleatët.

Theksojmë gjithashtu se zgjedhjet e këtij viti shënuan një pjesëmarrje më të ulët se në vitin 2021, ndërsa 55.334 vota u shpallën të pavlefshme gjatë numërimit.