Zelensky kërkon qartësi për garancitë e sigurisë për Ukrainën në rast marrëveshjeje paqeje me Putinin

Lajme

Gazeta Express

17/08/2025 17:12

Presidenti ukrainas Volodymyr Zelensky kërkoi më shumë qartësi mbi atë se si do të dukeshin “garancitë e sigurisë” për Ukrainën në rast të një marrëveshjeje paqeje gjatë një konference për shtyp në Bruksel më herët.

“Ajo që Presidenti Trump tha për garancitë e sigurisë është shumë më e rëndësishme për mua sesa mendimi i (Presidentit rus Vladimir) Putinit. Putini nuk do të na japë asnjë garanci sigurie”, tha Zelensky përkrah Presidentes së Komisionit Europian, Ursula von der Leyen.

Udhëheqësi ukrainas më tej renditi disa të panjohura rreth marrëveshjes së mundshme, përfshirë “nëse do të ketë ‘trupa në terren’, nëse do të ketë mbrojtje si në disa vende të tjera, në qiell, e dini çfarë dua të them”.

“Ne me të vërtetë duam të marrim një përgjigje për këto pyetje në mënyrë që të kuptojmë se çfarë janë garancitë e sigurisë”, shtoi ai.

Më vonë, Zelensky e falënderoi Ursulz von der Leyen për mbështetjen e Europës për Ukrainën pas konferencës për shtyp.

“Ne ramë dakord për domosdoshmërinë e një armëpushimi për hapat e mëvonshëm diplomatikë, garanci efektive sigurie për Ukrainën dhe vazhdimin e presionit të sanksioneve ndaj Rusisë për ta kufizuar potencialin e saj të ardhshëm”, shkroi Zelensky në X.

I dërguari amerikan Steve Witkoff tha për CNN këtë mëngjes se Presidenti rus Vladimir Putin u pajtua të lejojë një dispozitë për mbrojtje kolektive për Ukrainën në një marrëveshje të ardhshme paqeje.

Witkoff tha se kjo klauzolë – e ngjashme me marrëveshjen e NATO-s “Neni 5” që një sulm ndaj njërit është sulm ndaj të gjithëve – ishte një zgjidhje rreth këmbënguljes së Rusisë që Ukraina të mos mund të bëhet kurrë anëtare e NATO-s.

Presidenti amerikan më parë e ka shpërfillur kërkesën e shpeshtë të Kievit për garanci sigurie.