‘Zbulohet’ shuma që Reali e kërkon për Rodrygon, klubet angleze me “sy e veshë” nga Madridi

Sport

Gazeta Express

15/07/2025 17:20

Çmimi për yllin e Real Madridit, Rodrygo, është zbuluar mes raportimeve që e lidhin atë me një kalim në Premier League këtë verë.

Në javët e fundit, 24-vjeçari brazilian është përfolur për një largim nga “Santiago Bernabéu”, me Arsenalin, Liverpoolin dhe Chelsean që kanë shfaqur interes për të. Sipas raportimeve, Rodrygo është i gatshëm të largohet nga Madridi pas rënies në hierarki nën drejtimin e trajnerit të ri, Xabi Alonso.

Gjatë Kupës së Botës për Klube, ai e nisi titullar ndaj Al Hilalit, por më pas përfundoi në bankën e rezervave, një sinjal i qartë se pozita e tij në skuadër është lëkundur.

Gazetari Ben Jacobs ka raportuar muajin e kaluar se Arsenali ka interes të vërtetë për Rodrygon dhe ka zhvilluar kontakte eksploruese që nga muaji maj. Sipas tij, Real Madridi kërkon rreth 90 milionë euro për kartonin e sulmuesit.

Ndërkohë, burime të tjera në Spanjë, përfshirë Mundo Deportivo, kanë raportuar se Rodrygo është në rrugë për t’u larguar nga Real Madridi, dhe transferimi i tij mund të mbyllet për një shumë nga 60 deri në 80 milionë euro.

Rodrygo përflitet edhe si zëvendësues ideal për Luis Diaz te Liverpool, nëse kolumbiani largohet gjatë kësaj vere. Barcelona dhe Bayern Munich janë në mesin e klubeve të interesuara për Diaz.

Në fakt, ditën e martë u raportua se Liverpool ka refuzuar një ofertë prej 67.5 milionë eurosh nga Bayern për Luis Diaz. Gazetari i Sky Sports Germany, Florian Plettenberg, shkroi në rrjete sociale:
“Bayern ka dorëzuar ofertën e parë zyrtare për Luis Diaz këtë mëngjes, me vlerë 67.5 milionë euro. Ajo u refuzua menjëherë. Bayern po përgatit një ofertë të re. Transferimi i Diaz mbetet prioriteti kryesor i klubit gjerman.”

Bayerni ende nuk ka një marrëveshje përfundimtare me lojtarin, por besohet se kontrata e mundshme do të jetë deri në vitin 2029 ose 2030./GazetaExpress/