Zbulohet reagimi i Federico Chiesa-s pas përjashtimit nga lista e Liverpool për Champions League

Futboll

Gazeta Express

12/09/2025 14:39

Arne Slot ka lënë jashtë fushatës europiane sulmuesin italian. Reagimi i Federico Chiesa-s pas përjashtimit nga lista e Liverpool për Champions League është zbuluar.

Anësori italian iu bashkua Liverpool-it nga Juventus në vitin 2024 për 10 milion £ plus 2.5 milion £ bonuse shtesë.

Por viti i tij i parë ishte i vështirë, pasi nuk gjeti hapësirë nën drejtimin e Arne Slot, duke grumbulluar vetëm 104 minuta në Premier League. Kjo ndezi spekulime për një largim gjatë verës, të cilat u shtuan kur ai nuk u përfshi në turin parasezonal për shkak të një dëmtimi të vogël.

Chiesa vendosi të qëndrojë në Anfield dhe pati një ndikim të menjëhershëm në javën e parë, kur shënoi golin e fitores ndaj Bournemouth si zëvendësues.

Megjithatë, pavarësisht këtij fillimi pozitiv, ai u la jashtë listës 22-anëtarëshe për Champions League, ku në vend të tij u përfshi 17-vjeçari Rio Ngumoha.

Para ndeshjes së Liverpool kundër Burnley në Premier League, Slot foli për mediat mbi këtë vendim

“Është një nga gjërat më të vështira që duhet të bëjë një trajner. Ia shpjegova pse morëm këtë vendim. Sigurisht që nuk ishte i lumtur. Por mendoj se e kuptoi arsyetimin tim.”

Konkurrenca e shtuar për Chiesa-n

Ngumoha tashmë ka bërë bujë këtë sezon, duke shënuar golin e fitores në minutën e 100-të kundër Newcastle.

Rritja e tij, e kombinuar me përforcimet e reja në sulm, ka shtuar konkurrencën për Chiesa-n.

Vija sulmuese e Liverpool ka ndryshuar ndjeshëm gjatë verës. Pas vdekjes tragjike të Diogo Jotës dhe largimeve të Luis Diaz e Darwin Nunez, Slot lëvizi shpejt për të rindërtuar repartin ofensiv.

Hugo Ekitike iu bashkua për një shumë fillestare prej 69 milion £ nga Eintracht Frankfurt, ndërsa Alexander Isak erdhi për një rekord britanik prej 125 milion £.

Ekitike është përshtatur mirë, duke shënuar në Community Shield dhe në dy ndeshjet e para të ligës.

Ndërkohë, Isak pritet të ketë nevojë për kohë për të arritur formën optimale, por konsiderohet një nga sulmuesit më të provuar të Premier League.

Me Cody Gakpo dhe Mohamed Salah ende titullarë në krahë dhe me shfaqjen e Ngumoha-s si opsion i parë, Liverpool praktikisht ka tre sulmues të rinj.

Kjo do të thotë se mundësitë do të jenë të pakta për Chiesa-n dhe ai do të duhet të bindë trajnerin në minutat e kufizuara që do të marrë.

Në fitoren e fundit 1-0 kundër Arsenal, ai luajti vetëm 11 minuta si zëvendësues. /GazetaExpress/