Zbulohet ishulli i fshehtë në “zonën e rrezikut” të Antarktidës

Fun

Gazeta Express

10/04/2026 23:42

Një ekip shkencëtarësh që po eksploronte Detin Weddell në Antarktidë ka bërë një zbulim të papritur: një ishull të panjohur më parë, fillimisht i ngatërruar me një ajsberg të ndotur.

Ekipi prej 93 studiuesish, në bordin e akullthyeses “Polarstern” të Institutit Alfred Wegener, u detyrua të ndryshonte kurs për shkak të kushteve të vështira të motit dhe u strehua pranë ishullit Joinville. Pikërisht aty vunë re një masë toke me ngjyrë kafe të errët që nuk përputhej me akullnajat përreth.

“Gjatë rrugës, hartat detare tregonin një zonë me rreziqe të paidentifikuara për lundrim, por nuk ishte e qartë çfarë ishte apo nga vinte ky informacion,” shpjegoi specialisti i hartografisë nënujore Simon Dreutter. “Kur dolëm në kuvertë pamë një ajsberg që dukej i ndotur. Por kur u afruam, kuptuam se ishte shkëmb. Pastaj ndryshuam kurs dhe u bë e qartë se përpara kishim një ishull.”

Anija iu afrua deri në rreth 150 metra distancë nga formacioni tokësor, ndërsa një dron u përdor për vëzhgim nga ajri. Matjet treguan se ishulli është rreth 130 metra i gjatë, 50 metra i gjerë dhe ngrihet afro 16 metra mbi nivelin e detit—afërsisht sa gjatësia e Piramidës së Madhe të Gizës.

Shkencëtarët ende nuk e dinë pse zona ishte shënuar si “zonë rreziku” në hartat detare, ndërsa në të dhëna të tjera nuk figuronte si vijë bregdetare. Sipas tyre, në imazhet satelitore ishulli ishte pothuajse i padallueshëm nga ajsbergët përreth për shkak të mbulesës së akullit.

Para se të përfshihet në hartat zyrtare, ishullit duhet t’i jepet një emër. Ekipi ende nuk ka marrë një vendim, ndërsa në rrjetet sociale kanë nisur tashmë propozimet me humor—nga “Eisberg”, te “Lummerland” (nga një libër për fëmijë), e deri te “Bird Rendezvous Island”.

Lajmi vjen pak kohë pas shfaqjes së një tjetër ishulli të ri pranë Venecias, i quajtur Bacan, i cili dikur formohej vetëm në verë, por tani është bërë i përhershëm falë barrierave mbrojtëse nga përmbytjet. Sot ai është i mbuluar me bimësi dhe është kthyer në një ekosistem të vogël, edhe pse disa ekspertë paralajmërojnë se këto ndryshime mund të jenë shenjë shqetësuese për ekuilibrin delikat të lagunës së Venecias. /GazetaExpress/