‘Zbulohen’ tri kushtet e Modricit, për të qëndruar te Milani edhe një sezon

Futboll

Gazeta Express

18/04/2026 17:40

“Sky Sport Italia” raporton se mesfushori kroat Luka Modric ka vendosur tri kushte për të qëndruar te Milani edhe pas verës, njëri prej tyre është që Massimiliano Allegri të vazhdojë si trajner.

Kontrata e Modrićit me Milanin skadon në fund të sezonit dhe, edhe pse kuqezinjtë kanë opsion për ta zgjatur deri në vitin 2027, ata do ta aktivizojnë këtë klauzolë vetëm nëse kroati është i gatshëm të qëndrojë për një sezon të dytë.

Sipas “Sky Sport Italia”, Modrić ka vendosur tre kushte për të vazhduar në “San Siro”: kualifikimin në Ligën e Kampionëve, qëndrimin e Allegrit dhe një projekt konkurrues.

Modrić, ish-yll i Real Madridit, iu bashkua Milanit si lojtar i lirë verën e kaluar dhe ka qenë titullar i rregullt nën drejtimin e Allegrit këtë sezon, duke nisur 30 nga 32 ndeshje në Serie A.

Ndërkohë, Allegri është lidhur së fundmi me postin e trajnerit të kombëtares së Italisë dhe ende nuk ka konfirmuar nëse do të qëndrojë te Milani pas verës.

Megjithatë, gjatë një konference për shtyp të shtunën, trajneri italian theksoi se nuk është mësuar me ndryshime të shpeshta në karrierën e tij si trajner, duke lënë të kuptohet se mund të qëndrojë në klub të paktën edhe një sezon tjetër./GazetaExpress/