Zaimi thotë se Vetëmenaxhimi është në përputhje me Kushtetuten ndryshe nga “Zajednica”

Lajme

Gazeta Express

19/03/2023 0:20

Arbër Zaimi i VV’së thotë se njëra ndër gjërat që kryeministri i Kosovës, Albin Kurti ka arritur sot është që të drejtat e serbëve të Kosovës tash e tutje negociohen me BE-në, jo me Beogradin, dhe jo në kuadër vetëqeverisjeje, por në kuadër vetëmenaxhimi.

Sipas tij, vetëmenaxhimi është në përputhje me Kushtetuten ndryshe nga çka qenë “Zajednica”.

Zaimi përmes një shkrimi në Facebook tha se pas gjithë kësaj, ende Serbia nuk ka nënshkruar asgjë, gjë që sipas tij, ende nuk ia ka mbyllur derën Rusisë.

Më poshtë mund ta lexoni postimin e plotë të Zaimit:

Nga konferenca e Borrellit kuptohen dy gjëra mbi aneksin e ri që është negociuar sot:

1. Nga Serbia pritet zbardhje e fatit të personave të pagjetur: me kalendar konkret.
2. Nga Kosova pritet të nisë sa më shpejt negociata me BE për të gjetur një zgjidhje të përshtatshme për vetëmenaxhimin e serbëve të Kosovës.
   Të parën rrallëkush nga analistët po e përmend, por kjo nëse arrihet nuk është gjë e vogël, edhe pse personalisht besoj se Serbia do të refuzojë të hedhë hapa në këtë drejtim.
   Të dytën po e trajtojnë si “pranim të zajednicës”. Por nëse qenka ashtu, pra nëse qenka pranuar formula e vjetër e 2013/2015, atëherë pse të fillojnë negociata urgjente mes Kosovës dhe BE-së për gjetjen e një zgjidhjeje të përshtatshme për vetëmenaxhimin?
   Për mendimin tim, një ndër gjërat që Kurti ka arritur sot është kjo: të drejtat e serbëve të Kosovës tash e tutje negociohen me BE-në, jo me Beogradin, dhe jo në kuadër vetëqeverisjeje por në kuadër vetëmenaxhimi (pra me terma të reja në kuadër të negocimit për gjetjen e një zgjidhjeje të re, që të jetë e përshtatshme – pra e zbatueshme në raport me ligjet dhe Kushtetutën e Kosovës – ndryshe nga ç’ka qenë zajednica).
   Megjithatë të shohim. Serbia nuk ka nënshkruar, gjë që do të thotë se nuk ia ka mbyllur derën Rusisë.