Ylli i Italisë, Tonali, flet për jetën në Newcastle dhe përpjekjet për të kuptuar dialektin vendor të anglishtes

Futboll

Gazeta Express

09/05/2025 21:39

Mesfushori i Italisë, Sandro Tonali, ka treguar detaje nga jeta e tij e përditshme në Newcastle United, duke pranuar me humor se i duhen edhe “katër-pesë vjet të tjerë” për të kuptuar plotësisht theksin Geordie (dialekt lokal në qytetin anglez).

Tonali, i cili debutoi në Serie A me klubin e tij të lindjes, Brescia, dhe më pas kaloi te Milani, e përshkroi transferimin në Premier League si një hap të madh në karrierën e tij.

Megjithatë, ai theksoi se ndjehet më mirë tani që është sistemuar në një shtëpi me të fejuarën e tij, Giulia, me të cilën është fejuar së fundmi dhe ka caktuar datën e martesës më 1 korrik. Tonali shpreson që verën tjetër të jetë i angazhuar me përfaqësuesen e Italisë në Kupën e Botës.

“Jeta në Angli dhe kupa e parë”

Në një video për kanalin zyrtar të YouTube të Newcastle United, Tonali zbuloi momente nga jeta e tij personale, duke e përshkruar periudhën te Milani si “ëndërr të realizuar” për veten dhe për babain e tij.

Ai gjithashtu tregoi se ka fituar trofeun e parë me Newcastle – EFL Cup, pas një fitoreje kundër Liverpoolit të Federico Chiesas në finale.

Në video, Tonali prezantoi edhe qenin e tij, Margot, dhe pranoi se ende ka vështirësi me disa pjesë të gjuhës angleze – veçanërisht me dialektin vendas.

“Nuk e kuptoj Geordie. Më duhen edhe katër-pesë vjet të tjera…” – u shpreh ai me të qeshur.