Xavi Simons po i bënë presion Leipzigut që ta lë të largohet

Sport

Gazeta Express

24/08/2025 13:34

E ardhmja e Xavi Simons duket se është larg Gjermanisë. Mesfushori i ri ofensiv holandez, vetëm 22 vjeç, ka vendosur të hedhë një hap më tej në karrierën e tij dhe e ka bërë të qartë: ai nuk dëshiron të vazhdojë te RB Leipzig.

Projekti i skuadrës gjermane nuk e bind lojtarin, i cili ndjen se ekipi është shumë larg për të konkurruar për trofe të rëndësishëm dhe, për më tepër, jashtë garave evropiane – një skenar i pamjaftueshëm për një talent të kalibrit të tij.

Fillimi i sezonit vetëm sa ka forcuar bindjet e tij. Në javën e parë të Bundesligës, Leipzig u shkatërrua nga Bayern Munich me rezultatin e thellë 6-0, duke treguar diferencën e madhe mes dy projekteve. Sipas Mundo Deportivo, Simons nuk dëshiron të humbasë më kohë dhe i ka shprehur bordit dëshirën për t’u larguar nga klubi.

Destinacioni është i qartë: Chelsea. Klubi londinez ka javë që po punon për transferimin e tij dhe, sipas burimeve pranë operacionit, tashmë ekziston një marrëveshje mes lojtarit dhe klubit anglez. Çështja qëndron tek fakti se “blutë” duhet të largojnë disa lojtarë përpara se të bëjnë afrime të reja, përfshirë këtu edhe Alejandro Garnacho, një tjetër emër në listën e Stamford Bridge.

Rouven Schroder, drejtori sportiv i Leipzig, pranoi se situata është e hapur. “Merkato është ende në vazhdim, nuk mund të garantojmë asgjë 100%,” deklaroi ai, duke pranuar indirekt se largimi i yllit të tyre është një mundësi reale. Ai gjithashtu shtoi se lojtari ka bërë të qartë ambicien e tij për të kaluar në një klub më të madh.

Shifrat e Xavi Simons mbështesin dëshirën e tij për të ngjitur shkallët në futbollin evropian. Në sezonin 2024-25, ai ka luajtur në 33 ndeshje në të gjitha kompeticionet, duke shënuar 11 gola dhe dhuruar 9 asiste. Statistika mbresëlënëse për një lojtar kreativ, me ritëm dhe instinkt konkurrues, që e bëjnë atë një profil ideal për Premier League.

RB Leipzig po përpiqet ta mbajë, i vetëdijshëm se humbja e një prej lojtarëve më të talentuar do ta dobësonte ndjeshëm projektin e tyre. Megjithatë, vetë lojtari po ushtron presion që dëshirat e tij të respektohen.

Ndjenja në rrethin e holandezit është se transferimi duhet të zgjidhet para Ditës së fundit të merkatos, pasi ai beson se Chelsea i ofron skenën perfekte për t’u afirmuar mes elitës së kontinentit.
Përplasja ka nisur: nga njëra anë, një klub që nuk dëshiron të humbasë yllin e tij; nga ana tjetër, një lojtar i vendosur për të bërë hapin vendimtar në karrierë. Ajo që është e qartë, është se e ardhmja e afërt e Xavi Simons do të jetë një nga telenovelat më të mëdha të kësaj merkatoje./GazetaExpress/