Xabi Alonso e gjen “Wirtzin” e tij te Reali, pa dhënë asnje cent

Sport

Gazeta Express

12/07/2025 10:02

Xabi Alonso mund të ketë zbuluar “Florian Wirtzin” e radhës — dhe ai tashmë është lojtar i Real Madridit.

Vetëm muajin e kaluar, Liverpool tronditi botën e futbollit pasi njoftoi se kishte nënshkruar me yllin e Bayer Leverkusen, Florian Wirtz, për një shifër rekord për klubin: 100 milionë £ të garantuara, plus 16 milionë £ të tjera në bonuse.

Mesfushori gjerman tërhoqi interesin e disa prej klubeve më të mëdha të Europës, përfshirë Bayern Munich dhe Real Madridin, por në fund vendosi të firmosë një kontratë pesëvjeçare me skuadrën angleze.

Që nga ajo kohë, si Bayerni ashtu edhe Madridi janë detyruar të kërkojnë alternativa për mesfushorin e talentuar – një detyrë e vështirë, duke qenë se të dyja klubet ishin të përfshira në Kupën e Botës për Klube.

Por duket se kalendari i ngjeshur i Realit në këtë kompeticion ka qenë një bekim i fshehur, pasi i ka dhënë mundësinë Xabi Alonsos të zbulojë një lojtar që mund të jetë pasardhësi ideal i Wirtz: Arda Güler.

Pavarësisht eliminimit të turpshëm të Real Madridit nga PSG me rezultatin 4-0, turneu i ka shërbyer Alonsos për të njohur më mirë skuadrën e tij të re.

Gjatë këtij procesi, spanjolli ka kuptuar sa i talentuar është mesfushori i ri turk, duke e identifikuar atë si një lojtar që mund të luajë të njëjtin rol që kishte Wirtz te Leverkuseni i tij.

Siç theksohet në një analizë të “TotalFootballAnalysis”, Alonso ka përdorur Güler në disa pozicione gjatë Kupës së Botës për Klube për të kuptuar se si përshtatet më mirë në sistemin e tij.

Kundër Juventusit, 20-vjeçari luajti si anësor i kthyer nga brenda (inverted winger), ndërsa ndaj Dortmundit ai luajti në një dyshe mesfushore përkrah Aurélien Tchouaménit.

Në të dyja ndeshjet, Güler u dallua si një nga lojtarët më të mirë në fushë, duke treguar se – ashtu si Wirtz – ka aftësinë të marrë dhe shpërndajë topin shpejt dhe me saktësi në distanca të ndryshme, si dhe të krijojë raste për shokët e ekipit.

Edhe pse Real Madrid ka në përbërje disa nga mesfushorët më të mirë në botë si Jude Bellingham dhe Federico Valverde, askush nuk i përshtatet më mirë rolit të Wirtz në sistemin e Alonsos sesa Arda Güler.

Wirtz zhvilloi 119 ndeshje nën drejtimin e Alonsos dhe ka lënë një boshllëk të madh pas largimit, por Güler ka potencialin të ofrojë të njëjtën fleksibilitet taktik që gjermani i jepte skuadrës së Leverkusenit.

Për këtë arsye, është shumë e mundur që ai të bëhet pjesë e rregullt e formacionit të parë të Real Madrid sezonin e ardhshëm./GazetaExpress/