West Ham bën ofertë për Hector Fort

Futboll

Gazeta Express

22/08/2025 11:40

Barcelona po synon të finalizojë disa largime para mbylljes së afatit kalimtar, në mënyrë që të lehtësojë problemet me regjistrimet e lojtarëve këtë verë, pasi Gerard Martin, Roony Bardghji dhe Wojciech Szczesny nuk janë ende të disponueshëm. Njëri nga futbollistët që pritet të largohet është mbrojtësi i djathtë, Hector Fort.

19-vjeçari, i cili mund të luajë edhe në të majtë, pas një sezoni premtues nën drejtimin e Xavi Hernandez ka humbur hapësirën nën urdhrat e Hansi Flick. Aktualisht, Eric Garcia shihet si alternativa kryesore pas Jules Kounde, duke e lënë Fort në plan të dytë.

Pas interesimit për Marc Casado, West Ham United ka paraqitur ofertën e saj edhe për Fort. Sipas Sport, futbollisti është i hapur për një kalim në Premier League, i joshur edhe nga një rritje e pagës, por ka vendosur një kusht të qartë: transferimi të jetë vetëm në formë huazimi, pa opsion apo detyrim blerjeje. Fort ende dëshiron të ketë sukses te Barcelona dhe synimi i tij është të zhvillohet më tej për t’u rikthyer verën e ardhshme.

Përveç West Ham-it, interes për të ka shfaqur edhe Mallorca, por klubi spanjoll po pret fillimisht largimin e Pablo Maffeo. Everton gjithashtu e ka pasur nën vëzhgim Fortin, ndërsa edhe Como ka pyetur për situatën e tij. Të premten, Fort nuk ishte pjesë e stërvitjes së Barcelonës, pasi kishte marrë leje për të negociuar largimin.

Talenti i Barcelonës shihej si lojtar me rol më të madh sezonin e kaluar, por pas ardhjes së Flick nuk arriti ta bindte trajnerin gjerman. Në total, ai zhvilloi vetëm 638 minuta lojë dhe në prill shfaqi publikisht frustrimin e tij në fushë. Pas kësaj, Flick e qortoi haptazi, ndërsa tani një huazim shihet si mundësi e mirë për zhvillimin e tij.