Vuçiq thirrje serbëve që ta votojnë Listën Srpska: Nuk marrin urdhra nga Kurti e as nga ambasadat

Lajme

Gazeta Express

09/10/2025 16:39

Presidenti i Serbisë, Aleksandar Vuçiq, tha se nuk e fsheh thirrjen e tij për popullin serb për votimin e Listës Srpska në zgjedhjet e së dielës në Kosovë.

Ai ka lavdëruar këtë parti dhe tha se “asnjë parti politike në kontinentin europian s’i ka mbijetuar një terrori të tillë”, duke i bërë jehonë narrativës që Serbia ndjek tash e një kohë se në Kosovë “serbët po persekutohen.

Vuçiq më pas pretendoi se jo të gjithë brenda kësaj partie janë “të mirë e të ndershëm”, një aludim që u duk për ish-nënkryetarin e Listës Srspka, Milan Radoiçiq, i cili udhëhoqi sulmin terrorist të Banjskës. Sidoqoftë, Radoiçiq mbetet i lirë dhe i strehuar në Serbi pavarësisht thirrjeve për ta mbajtur përgjegjës atë, shkruan Kossev, transmeton Gazeta Express.

“Nuk po e fshehim thirrjen për të votuar për Listën Srpska. Sepse është një listë e përgjegjshme që përfaqëson interesat e popullit serb, e cila nuk urdhërohet nga Kurti, as nuk merr urdhra nga ambasada të tjera. A është gjithçka gjithmonë më e mira dhe a janë të gjithë të sjellshëm, të mirë dhe të ndershëm – është e pamundur që ata të jenë…, por këta janë, në fund të fundit, njerëz që i kanë rezistuar një terrori të tillë, të cilit asnjë parti politike nuk i ka rezistuar në historinë moderne në kontinentin europian”, pretendoi Vuçiq.

Këto deklarata Vuçiq i bëri gjatë një fjalimi të jashtëzakonshëm nga ndërtesa e Sekretariatit të Përgjithshëm të Presidentit të Republikës.

Në një fjalim të gjatë, të cilin e filloi me temën e sanksioneve kundër NIS që hynë në fuqi këtë mëngjes, ai foli edhe për Kosovën.