Vrasja e 2021-ës në Mitrovicë: Kirurgu thotë se të dëmtuarit ia dhanë predhën pasi ia larguan nga trupi, po s’i lajmëruan organet përgjegjëse

Lajme

Gazeta Express

10/12/2024 9:04

Në rigjykimin ndaj Leotrim Selimit dhe Bejtë Hasanit, të akuzuar për rastin e vrasjes së M.K., në shkurt të 2021-ës në Mitrovicë, të hënën në cilësinë e dëshmitarit u dëgjua kirurgu Fatbardh Rexha, i cili tha se predhën ia kishin dhënë tani të dëmtuarit Florim Sadiku pasi ia kishin nxjerrë nga trupi, ndërsa rastin nuk e kishin lajmëruar te organet përgjegjëse.

Në këtë rast, Leotrim Selimi ngarkohet për vrasje të rëndë të M.K dhe plagosje të Behar Halilit si dhe ngarkohet për armëmbajtje pa leje. Ndërsa, Bejtë Hasani po akuzohet për vrasje të rëndë në tentativë dhe armëmbajtje pa leje, pasi sipas aktakuzës, me dashje kishte filluar kryerjen e veprës penale të vrasjes ndaj Florim Sadikut, e të cilën nuk e kishte përfunduar, raporton “Betimi për Drejtësi”.

Fillimisht, kryetari i trupit gjykues Fatos Sejdijaj njoftoi se në seancën e sotme gjyqësore, kirurgu Rexha nga poliklinika “Jeta” është thirrë për të sqaruar lidhur me intervenimin kirurgjik të bërë për të dëmtuarin Sadiku.

Kirurgu Rexha në cilësinë e dëshmitarit tha se trupi i huaj, i larguar nga trupi i pacientit – tani të dëmtuarit Sadiku, ka qenë në përbërje të metalit, dhe se përshtypja e parë e tij ka qenë se është predhë.

I pyetur nëse i është bërë ndonjë fotografi metalit-predhës së nxjerrë nga trupi i tani të dëmtuarit, dëshmitari tha se nuk bëjnë fotografi pasi primare ka qenë intervenimi i pacientit.

Dëshmitari tha se për shkak të procesit qelbësues, është vendosur që të bëhet heqja e qelbit, e cila procedurë paraprakisht nuk kërkon imazhe radiologjike dhe si e tillë është bërë ndërhyrja.

Ndërsa, anëtari i trupit gjykues, gjykatësi Avni Mehmeti e ka pyetur dëshmitarin se për çfarë arsye kishte shkuar pacienti në klinikë, pasi në raportin mjekësor konstatohet heqja e trupit të huaj, ndërsa sot gjatë deklarimit u tha se ai kishte shkuar për shkak të dhimbjeve.

E Rexha tha se ankesat kanë qenë për dhimbje nga procesi qelbësor, por pastaj mbas operimit është konstatuar heqja e trupit të huaj.

I pyetur nëse është dashur ta pyeste pacientin se nga çfarë ka ardhur trupi i huaj (metali në formë të predhës) në trupin e tij, kirurgu tha se zakonisht nuk i pyesin pasi e rëndësishme për ta është realizimi i operacionit në mënyrë të suksesshme.

Më pas, prokurori Njazi Rexha i propozoi gjykatës që të urdhërojë kryerjen e një super-ekspertize psikiatrike për të pandehurin Selimi, me arsyetimin se deklarata e ekspertit lidhur me konstatimin se i akuzuari ka kryer veprën penale në tronditje të fortë mendore, është e paargumentuar.

Prokurori Rexha tha se kemi një vend të ngjarjes me pjesëmarrës të njëjtë, por me dy ekzaminime të të pandehurve që dallojnë njëra me tjetërn, ku eksperti Tahir Bunjaku konstaton se te i pandehuri Selimi ka ekzistuar frika e fortë mendore, edhe përkundër faktit se i dëmtuari ka pasur në duar një kabllo elektrike, ndërsa i pandehuri armë.

Kurse, tha se ekspertja psikiatrike Valbona Blakaj nga i njëjti Institut, konstaton që nuk mund të flitet për frikën e nivelit të lartë që ta dëmtojë vetëdijen kur personi mban armë në duar.

Përfaqësuesi i palëve të dëmtuara, avokati Asdren Bytyqi mbështeti propozimin e prokurorit Rexha dhe shtoi se ekspertiza psikiatrike për të pandehurin Selimi është joprofesionale, jo e pavarur dhe kontradiktore me vetë deklarimin e ekspertit Bunjaku.

Bytyqi ndër të tjera tha se eksperti Bunjaku ka deklaruar se i pandehuri Selimi në tronditje mendore ka rënë pa fajin e tij dhe pa përgatitje paraprake, ndërsa i pandehuri Selimi e ka ditur se së bashku me tre persona të tjerë, të gjithë të armatosur kanë shkuar në lokalin e të dëmtuarve, pra me përgatitje paraprake dhe me mundësi ballafaqimi.

Avokati Bytyqi tha se eksperti e kishte bërë rolin e mbrojtjes kur kishte thënë se i pandehuri mbajtjen e armës e arsyeton nga arsyet e tij personale, ku sipas tij kjo dëshmon jo-objektivitetin dhe joprofesionalizmin e ekspertizës.

Ndërsa, mbrojtësi i të akuzuarit Selimi, avokati Naser Sopjani kundërshtoi propozimin e prokurorit Rexha dhe avokatit Bytyqi, me arsyetimin se ky propozim është në kundërshtim me dispozitat ligjore.

Sopjani i kërkoi Gjykatës që ky propozim të refuzohet, me arsyetimin se ekspertiza nuk ka kontradikta në mes të ekspertëve që e kanë përpiluar, pasi konstatimet janë të qarta dhe përshtaten me të gjitha rrethanat e sqaruara në shqyrtime gjyqësore.

Në fund, Gjykata refuzoi propozimin e prokuroit Rexha për nxjerrjen e super-ekspertizës psikiatrike për të pandehurin Selimi, ndërsa arsyet e refuzimit do të paraqiten në vendim.

Më 8 shtator 2023, Gjykata Themelore në Mitrovicë, e kishte dënuar me dënim unik prej 21 vjet e gjashtë muaj burgim të akuzuarin Leotrim Selimi, ndërsa Bejtë Hasani u dënua me dënim unik prej 7 vjet e 6 muaj.

Mirëpo, ndaj këtij vendimi, ankesë në Gjykatën e Apelit, kishin ushtruar mbrojtësit e të akuzuarve, me ç’rast më 19 janar 2024 Apeli aprovoi ankesat dhe sipas detyrës zyrtare e ka anuluar aktgjykimin e shkallës së parë dhe çështjen e ka kthyer në rigjykim.

Ndryshe, Prokuroria Themelore në Mitrovicë më 28 tetor 2021 kishte ngritur aktakuzë kundër Leotrim Selimit, Bejtë Hasanit, Valon Ibishit dhe Valmir Selimit.

Të akuzuarit Valon Ibishi dhe Valmir Selimi më 17 nëntor 2021 janë dënuar me nga 700 euro gjobë dhe me burgim me kusht në kohëzgjatje prej 8 muajsh (secili veç e veç), pasi pranuan fajësinë për armëmbajtje pa leje dhe përdorim të armës apo mjetit të rrezikshëm.

Të akuzuarit Leutrim Selimi dhe Bejtë Hasani e kishin pranuar fajësinë vetëm për armëmbajtje pa leje, andaj gjykata refuzoi këtë pranim fajësie dhe ndaj tyre ishte veçuar procedura.

Sipas pikës I.1 të aktakuzës, Leotrim Selimi më 12 shkurt 2021, në rrugën “Bislim Bajgora” në Mitrovicë, me dashje ka privuar nga jeta të ndjerin M.K, ku pas një mosmarrëveshje rreth punëtorëve me pronarin e “Proper Pizza”, Albert Beqiri, vjen deri te konflikti mes grupit të “Maestros”, Leotrim Selimi, Bejtë Hasani, Valmir Ibishi, Liridon Selimi, Labinot Selimi, dhe grupit të “Proper Pizza”, Mentor Beqiri, Florim Sadiku, Behar Halili e M.K.

Sipas aktakuzës thuhet se i pandehuri Leotrim Selimi kishte nxjerrë pistoletën e markës “Crvena Zastava” dhe kishte shtënë në viktimën dhe godet në pjesën e përparme të djathtë të kraharorit e si rezultat i plagëve të marra vdes. Tutje, në aktakuzë thuhet se predhat e goditin edhe Behar Halilin, duke i shkaktuar lëndime të rënda trupore.

Me këtë, thuhet se ka kryer veprën penale “Vrasja e rëndë” nga neni 173, par.1, pika 1.5 të Kodit Penal, ku kryerësi dënohet me jo më pak se 10 vite burgim ose me burgim të përjetshëm.

Ndërsa, në pikën I.2 të aktakuzës thuhet se i pandehuri Leotrim Selimi më 12 shkurt 2021 në Mitrovicë në rrugën “Bislim Bajgora” në kundërshtim me ligjin e zbatueshëm mbi armët, ka poseduar pistoletën e markës “Crvena Zastava”, me një karikator, e cila i është sekuestruar nga policia.

Me këtë, sipas aktakuzës, ka kryer veprën penale “Mbajtja në pronësi, në kontroll, ose posedim të paautorizuar të armëve” nga neni 366, par. 1 të KPRK e në bashkim real me veprën penale nën pikën 1 të dispozitivit.

Sipas pikës II.1 të aktakuzës, Bejtë Hasani më 12 shkurt 2021, në rrugën “Bislim Bajgora” në Mitrovicë, me dashje ka filluar kryerjen e veprës penale të vrasjes ndaj Florim Sadikut, e të cilën nuk e ka përfunduar.

Tutje në aktakuzë thuhet se pas fjalosjes mes grupit të “Proper Pizza”, Mentor Beqiri, Florim Sadiku, Behar Halili e M.K, dhe grupit të “Maestros” Leotrim Selimi, Bejtë Hasani, Valmir Ibishi, Liridon Selimi, Labinot Selimi, rreth punëtorëve, nxjerrë pistoletën e markës “Crvena Zastava”, dhe shtie në drejtim të grupit të “Proper Pizza”, me këtë rast e godet Florim Sadikun dhe i shkakton dëmtime të rënda trupore, si dhe vë në rrezik jetën e personave të grupit të “Proper Pizza”.

Me këtë, akuzohet se ka kryer veprën penale “Vrasja e rëndë në tentativë” nga neni 173, par. 1, pika 1.5 e lidhur me nenin 28 të KPRK-së.

Ndërsa, sipas pikës II. 2 të aktakuzës, i pandehuri Bejtë Hasani më 12 shkurt 2021 në Mitrovicë në rrugën “Bislim Bajgora” në kundërshtim me Ligjin e zbatueshëm mbi armët ka poseduar pistoletën e markës “Crvena Zastava”, e cila i është sekuestruar nga policia.

Me këtë, akuzohet se ka kryer veprën penale “Mbajtja në pronësi, kontroll, ose posedim të paautorizuar të armëve” nga neni 366, par. 1 të KPRK, e në bashkim real me veprën penale nën pikën 1 dhe 2 të dispozitivit.

Gjithnjë sipas aktakuzës, në pikën III. 1 thuhet se i pandehuri Valon Ibishi më 12 shkurt 2021, në Mitrovicë në rrugën “Bislim Bajgora” në kundërshtim me ligjin e zbatueshëm mbi armët, ka poseduar pistoletën e prodhuesit “Tulla Tukarev”, e cila është sekuestruar nga policia.

Me këtë, thuhet se ka kryer veprën penale “Mbajtja në pronësi, kontroll, ose posedim të paautorizuar të armëve” nga neni 366, par. 1 të KPRK.

Ndërsa, në pikën III.2 të aktakuzës thuhet se i pandehuri Valon Ibishi më 12 shkurt 2021, në Mitrovicë në rrugën “Bislim Bajgora” në kundërshtim me ligjin e zbatueshëm mbi armët ka përdorur në mënyrë kërcënuese pistoletën e prodhuesit “Tulla Tukarev”, duke e nxjerrë gjatë konfliktit mes grupeve dhe drejtuar M.K., Mentor Beqirit, Florim Sadikut dhe Behar Halilit.

Me këtë, thuhet se ka kryer veprën penale “Përdorimi i armës apo mjetit të rrezikshëm” nga neni 367, par. 1 të Kodit Penal, e në bashkim real me veprën penale nën pikën III/1.

Ndërsa, në pikën e fundit IV.1 të aktakuzës, i pandehuri Valmir Selimi thuhet se më 12 shkurt 2021, në Mitrovicë në rrugën “Bislim Bajgora” në kundërshtim me ligjin e zbatueshëm mbi armët ka poseduar pistoletën e markës gjysmëautomatike ‘Eibar Star”, me një karikator dhe tre fishekë, e cila është sekuestruar nga policia.

Me këtë, akuzohej se ka kryer veprën penale “Mbajtja në pronësi, kontroll, ose posedim të paautorizuar të armëve” nga neni 366, par. 1 të KPRK-së.

Ndërsa, në pikën IV. 2 të aktakuzës thuhet se i pandehuri Valmir Selimi më 12 shkurt 2021, në Mitrovicë në rrugën “Bislim Bajgora” në kundërshtim me Ligjin e zbatueshëm mbi armët ka përdorur në mënyrë kërcënuese ndaj grupit të “Proper Pizza”, Mentor Beqiri, Florim Sadiku, Behar Halili, e M.K., pistoletën e markës “Eibar Star”, duke e nxjerrë dhe repetitë para lokalit.

Me këtë, sipas aktakuzës, ka kryer veprën penale “Përdorimi i armës apo mjetit të rrezikshëm” nga neni 367, par. 1 të Kodit Penal, e në bashkim real me veprën penale nën pikën IV/1 të dispozitivit.