Vrasësi izraelit në Uashington mund të përballet me dënim me vdekje

Lajme

Gazeta Express

23/05/2025 7:38

Një burrë i lindur në Çikago është arrestuar si i dyshuari i vetëm për të shtënat që vranë dy punonjës të ambasadës izraelite jashtë Muzeut të Trashëgimisë Hebraike në Uashington. Dje, ai u akuzua në gjykatën federale për dy akuza për vrasje të shkallës së parë.

Elias Rodriguez, 31 vjeç, akuzohet se ka hapur zjarr ndaj një grupi njerëzish të mërkurën në mbrëmje, ndërsa ata po largoheshin nga një aktivitet për diplomatë të rinj të organizuar nga Komiteti Amerikan Hebraik, një grup që mbështet Izraelin dhe lufton antisemitizmin. Zyrtarët thanë se ai u dëgjua duke brohoritur “Palestina e Lirë” pasi u arrestua.

Përveç vrasjes së shkallës së parë, Rodriguez akuzohet për vrasjen e një zyrtari të huaj, shkaktimin e vdekjes me armë zjarri dhe përdorimin e armës së zjarrit në një krim të dhunshëm. Viktimat e Rodriguez u identifikuan si 30-vjeçari Yaron Lischinsky dhe 26-vjeçarja Sarah Lynn Milgrim, një çift i ri që ishin gati të fejoheshin.

Një çift i ri nga ambasada izraelite ishin gati të fejoheshin. Ata u vranë në Uashington.

Miqtë dhe anëtarët e grupeve të cilave ata u përkisnin thanë se çifti ishte i përkushtuar për të ndërtuar ura midis arabëve dhe hebrenjve me shpresën për të ndaluar gjakderdhjen në Lindjen e Mesme.

Pas të shtënave, ambasadat izraelite në mbarë botën menjëherë shtuan masat e sigurisë. Prokurorja në detyrë e SHBA-së për Qarkun e Uashingtonit, Jeanine Pirro, tha se të shtënat po hetohen si një akt terrorizmi dhe se mund të pasojnë akuza të tjera.

Pirro tha se ishte “shumë herët” për të thënë nëse do të kërkonte dënimin me vdekje, por se ishte “një rast që i plotëson kushtet për dënim me vdekje”.