Vjen reagimi nga Vetëvendosje pas kërcënimit ndaj Kurtit nga anëtari i Nismës

Gazeta Express

28/12/2019 20:17

Deputeti i Kuvendit të Kosovës nga radhët e Lëvizjes Vetëvendosje, Artan Abrashi, i ka reaguar anëtarit të Nismës Socialdemokrate, Haxhi Hotit, i cili sot tha se Albin Kurti ka dy rrugë, të lëshojë Kosovën ose të vritet.

“Asnjë kërcënim apo atentat nuk na ndalon në rrugën tonë. Kosova do të bëhet!”, ka shkruar Abrashi në llogarinë e tij në Facebook.

Pas deklaratës së Hotit, njëherësh kandidat për deputet nga radhët e koalicionit Nisma-AKR-PD, ka reaguar edhe Nisma duke u distancuar nga deklaratat e tij.

Ministri Shala ka thënë se Nisma Socialdemokrate distancohet nga çdo deklaratë e tillë e cila nxitë urrejtje. Ai gjithashtu ka thënë se dihet qasja e Nismës karshi subjekteve dhe liderëve të tjerë politikë dhe se një gjuhë e tillë nuk është gjuhë e Nismës.

“Nisma Socialdemokrate distancohet nga çdo deklaratë e tillë e cila nxitë urrejtje”, ka thënë Shala për Gazetën Express.

“Dihet qasja e Nismës në raport me të gjitha subjektet tjera politike dhe të gjithë liderëve politikë. Një gjuhë e tillë e përdorur nuk është gjuhë e cila rrjedh nga Nisma”, ka përfunduar Shala