Vjedhje në Tour de France: 11 biçikleta të ekipit Cofidis rrëmbehen natën para etapës së dytë

Sport

Gazeta Express

06/07/2025 22:04

Tour de France 2025 u trondit nga një ngjarje e pazakontë në orët e para të mëngjesit të së dielës, kur hajdutët sulmuan kamionin e ekipit Cofidis dhe vodhën 11 biçikleta, me një vlerë totale prej afro 145,000 eurosh. Vjedhja ndodhi para nisjes së etapës së dytë, që zhvillohej mes Lauwin-Planque dhe Boulogne-sur-Mer.

Sipas ekipit, çdo biçikletë kishte një vlerë prej rreth 13,000 eurosh, por ajo që dëmtoi më së shumti moralin ishte vjedhja e biçikletës speciale 795 Blade RS, e përgatitur për liderin e renditjes malore, Benjamin Thomas, i cili do ta përdorte në këtë etapë.

Në një deklaratë në rrjetet sociale, Cofidis shkroi:

“Gjatë natës nga e shtuna në të dielën, ekipi Cofidis ishte viktimë e një vjedhjeje. Dyert e kamionit të punëtorisë u hapën me forcë dhe 11 biçikleta të prodhuesit LOOK Cycle u vodhën, pavarësisht masave të sigurisë të vendosura.”

Policia u paraqit në mëngjes për të hetuar ngjarjen dhe për të mbledhur prova në vendngjarje.

Ky nuk është rasti i parë i tillë në Tour de France. Vitin e kaluar, ekipi TotalEnergies pësoi një fat të ngjashëm, ku humbi gjithashtu 11 biçikleta, bashkë me mjetet e punës së mekanikëve. Ndërsa në Milan-San Remo, çiklisti Sonny Colbrelli dhe të tjerë arritën të ndalonin një përpjekje për vjedhje nga një grup prej 10 personash.

Pavarësisht kësaj goditjeje, Cofidis arriti t’i siguronte biçikleta rezervë për të nisur garën. CEO i LOOK Cycle, Federico Musi, deklaroi:

“Jemi të tronditur nga kjo vjedhje. Falë efikasitetit të mekanikëve të ekipit dhe mbështetjes sonë, çiklistët arritën të fillojnë sot me biçikleta rezervë. Fabrika jonë në Nevers është hapur enkas për të përgatitur biçikleta zëvendësuese, të cilat do të jenë gati që nesër në mëngjes.”

Biçikletat “Iconic Black Radial” të LOOK pritet të zëvendësojnë ato të vjedhurat brenda një kohe rekord, duke mundësuar vazhdimësinë e ekipit Cofidis në garë.

Ngjarja ngre edhe një herë shqetësimin mbi sigurinë e ekipeve në evenimente kaq të mëdha si Tour de France, ku vlera e pajisjeve është e jashtëzakonshme dhe vëmendja publike maksimale.