“Vezët e Pashkëve që të shëndoshin më shumë”

Ushqimi/Dieta

Gazeta Express

24/03/2026 19:19

Sa e pashëndetshme është veza juaj e preferuar e Pashkëve? Një studim i ri ka nxjerrë në pah 10 ëmbëlsirat më të dëmshme në raftet e supermarketeve – dhe njëra prej tyre ka aq kalori sa katër Big Mac!

Me afrimin e Pashkëve, raftet e supermarketeve janë mbushur me vezë çokollate, të cilat blihen jo vetëm për fëmijët, por edhe për të rriturit. Në Mbretërinë e Bashkuar, një i rritur konsumon mesatarisht tre deri në katër vezë të plota çokollate gjatë kësaj periudhe festive.

Një analizë e realizuar nga ekspertët e platformës digjitale shëndetësore ZAVA, që shqyrtoi mbi 40 produkte të njohura, zbuloi se disa prej këtyre ëmbëlsirave përmbajnë sasi alarmante kalorish.

Në krye të listës renditet veza Ferrero Rocher Golden Easter Egg, me 613 kalori për 100 gramë. Në total, një vezë prej 250 gramësh arrin në 1,532 kalori dhe përmban rreth 103 gramë sheqer – afërsisht 26 lugë çaji. Kjo përbën mbi 60% të dozës ditore të rekomanduar për burrat dhe gati 77% për gratë.

Në vendin e dytë vjen Raffaello Extra Large White Chocolate Easter Egg, me 606 kalori për 100 gramë dhe rreth 100 gramë sheqer në total – më shumë se trefishi i limitit ditor të rekomanduar.

Tre produkte nga Waitrose hyjnë në dhjetëshen më të keqe, ku më i rëndi është Cracking Pistachio Easter Egg, me 602 kalori për 100 gramë. Kjo vezë 320-gramëshe përmban 1,926 kalori dhe 142 gramë sheqer – pothuajse pesëfishin e kufirit ditor, ekuivalente me rreth katër hamburgerë Big Mac.

Në listë përfshihen edhe produkte të tjera si:

Milk Chocolate & Caramelised Biscuit Flat Egg

Dark Chocolate & Nut Flat Egg

Një tjetër variant me fëstëk, ASDA Pistachio & Himalayan Salt White Chocolate Egg, renditet i katërti me 591 kalori për 100 gramë dhe përmbajtje të lartë sheqeri.

Pesëshen e parë e mbyll Lindt Lindor Extra Large Dark Chocolate Easter Egg, e cila megjithëse ka më pak sheqer (25g/100g), mbetet shumë kalorike – rreth 1,525 kalori në total.

Ndërkohë, aplikacioni për numërimin e kalorive MyFitnessPal zbulon se produkti më i konsumuar gjatë Pashkëve janë Cadbury Mini Eggs, me mbi 230 mijë regjistrime. Një paketë 90-gramëshe përmban rreth 444 kalori.

Megjithatë, jo gjithçka lidhet vetëm me kaloritë. Disa produkte dallohen për përmbajtje ekstreme sheqeri. Në krye është Toblerone Golden Edgy Egg, me 61.2 gramë sheqer për 100 gramë – rreth 40 lugë çaji në një vezë të plotë.

Pas tij vijnë:

Aero Peppermint Chocolate Easter Egg (60.4g sheqer/100g)

Rolo Large Easter Egg (59.9g sheqer/100g)

Studimi thekson se, edhe pse këto produkte janë pjesë e festës, konsumimi i tepruar mund të ketë ndikim të ndjeshëm në shëndet – sidomos për shkak të kombinimit të lartë të kalorive dhe sheqerit. /GazetaExpress/