Vendim për paralele me më pak se 20 nxënës!

Maqedoni

Gazeta Express

29/08/2025 14:08

Edhe në vitin e ri shkollor 2025/2026, në Komunën e Dibrës do të ketë më pak filloristë në krahasim me vitin e kaluar. Shkaku kryesor mbetet emigrimi masiv i banorëve, si nga qyteti ashtu edhe nga fshatrat, drejt vendeve të Bashkimit Evropian, por edhe drejt SHBA-ve. Ky problem është debatuar në seancën e Këshillit Komunal të Dibrës, ku u soll edhe vendimi për formimin e paraleleve me më pak se 20 nxënës në të tre shkollat fillore të komunës.

Drejtorët e shkollave fillore “Penestia” dhe “Said Najdeni” në Dibër, si dhe të shkollës “Riste Ristevski” në fshatin Kosovrast i Poshtëm, në seancë para këshilltarëve paraqitën raportet dhe programet e punës, duke theksuar sidomos problemin e uljes së numrit të filloristëve, i cili është prezent edhe këtë vit shkollor. Drejtori i shkollës komunale “Penestia”, Ajet Mullarexha, deklaroi se migrimi po ndikon që edhe këtë vit të ketë më pak nxënës. Sipas tij, pritet që numri i filloristëve të jetë rreth 10 për qind më i ulët. Deri tani, në këtë shkollë janë regjistruar 50 filloristë në gjuhën shqipe dhe 21 në gjuhën maqedonase. Mullarexha theksoi se deri në fillim të vitit pritet që ky numër të arrijë në 60 nxënës në gjuhën shqipe, që megjithatë është 8 më pak se vitin e kaluar.

Situata është e ngjashme si në paralelet shqipe, ashtu edhe në ato maqedonase. Një tjetër problem është edhe borxhi i shkollave për pagesat e energjisë elektrike dhe materialeve të tjera. Mullarexha theksoi se në fillim të vitit shkollor duhet të respektohet regjistrimi i nxënësve sipas ndarjes territoriale të shkollave, për të shmangur problemet që janë shfaqur edhe viteve të kaluara. Të njëjtat shqetësime i shprehu edhe drejtori i Shkollës komunale “Said Najdeni”, Arsim Miftari. Në këtë shkollë, ku mësimi zhvillohet në gjuhën shqipe, deri tani janë regjistruar po ashtu rreth 10 për qind më pak nxënës në krahasim me vitin e kaluar. Konkretisht, deri më tani janë regjistruar 25 filloristë, por pritet që numri të arrijë në 40. Ai potencoi edhe problemin e devijimit të regjistrimit të nxënësve, të cilët viteve të kaluara, edhe pse i përkisnin rajonit të kësaj shkolle, regjistroheshin në Shkollën fillore “Penestia” që ndodhet në qendër të qytetit.

Edhe në Shkollën fillore “Riste Ristevski” në fshatin Kosovrast i Poshtëm, situata është e ngjashme, me ulje prej rreth 20 për qind të numrit të filloristëve. Deri më tani janë regjistruar 30 nxënës të klasës së parë, që është 13 më pak se vitin e kaluar. Drejtori i shkollës, Shanija Ajrovski, deklaroi se para fillimit të vitit shkollor shpesh ka raste të çregjistrimeve të nxënësve nga klasat e tjera, të cilët bashkë me prindërit kanë emigruar, kryesisht në Itali. Ai shtoi se në këtë shkollë, ku mësimi zhvillohet në gjuhën maqedonase, nga viti në vit ka një ulje drastike të numrit të nxënësve, pasi shumica e familjeve janë shpërngulur drejt Italisë dhe Gjermanisë. “Pa vendimin e Këshillit Komunal për formimin e paraleleve me më pak se 20 nxënës, shkolla nuk do të mund të funksionojë”, theksoi Ajrovski.

Në debat u vlerësua se kjo situatë me uljen drastike të nxënësve sjell rrezikun e mbetjes pa punë të arsimtarëve, sidomos atyre që janë me kontrata dhe nuk kanë vendime për punë të rregullt. Nëse vazhdon kjo tendencë, me uljen e numrit të nxënësve dhe, rrjedhimisht, të paraleleve, në të tre shkollat fillore të Komunës së Dibrës do të paraqitet edhe problemi i tepricës së arsimtarëve.