Vdiq shkrimtari dhe dramaturgu, Fadil Kraja - Gazeta Express

Arte

Gazeta Express

18/11/2021 18:11

Vdiq shkrimtari dhe dramaturgu, Fadil Kraja

Arte

Gazeta Express

18/11/2021 18:11

Shkrimtari dhe dramaturgu i shquar shqiptar, Fadil Kraja u nda sot nga jeta në moshën 91-vjeçare.

Lajmi u bë i ditur nga Teatri “Migjeni” në Shkodër, i cili i shprehu ngushëllimet e sinqerta familjes dhe gjithë komunitetit të artistëve.

Lexo Edhe:

Fadil Kraja ishte autor i njohur këngësh. Fadil Kraja përfundoi studimet e larta në Universitetin e Tiranës në Fakultetin e Filologjisë. Për shumë vite punoi si mësues i letërsisë në shkolla të mesme dhe më vonë pedagog i letërsisë së huaja në Fakultetin e Gjuhë-Letërsisë të Universitetit “Luigj Gurakuqi” në Shkodër. Nga viti 1972 gjer më 1992, shkrimtar në profesion të lirë duke vazhduar si pedagog i jashtëm në fakultet dhe njëkohësisht kryetar i Degës së Lidhjes së Shkrimtarëve dhe Artistëve për Degën e Shkodrës.

Vëllimi i parë poetik “Kënga ime” (1954) fitoi çmimin e parë në Konkursin Kombëtar të Letërsisë. Pastaj me radhë ka botuar vëllimet poetike “Melodi malësore”, “Jehona malesh”, vëllimet me tregime “Kandidatja e fundit”, “Fajin e kishte Besa”.

Mbi 40 drama dhe komedi të shfaqura në të gjithë teatrot profesioniste të Shqipërisë si dhe në Kosovë, Mal i Zi, Maqedoni dhe në diaspore. Mes tyre: “Fisheku në pajë”, “Sinjalet e natës”, “Shpartallimi”, “Baca i Gjetajve”, “Gjaku i Arbërit”, “Djem të mbarë”, “Çështja e Blertës”, “Flamur në dasëm”, “Rozafa”, “Kur flasin zemrat”, “Luani i shtëpisë”, “Çështje familjare” si dhe shumë drama për fëmijë, librete operash, operetash.

Kontributi i tij është çmuar edhe nga Presidenti i Shqipërisë, Rexhep Meidani, i cili i ka dhënë titullin e lartë “Mjeshtër i madh”.

Homazhet për Krajën do të zhvillohen në hollin e teatrit “Migjeni”./atsh