Vatikani reagon pas kritikave të Trump: Papa nuk flet gjuhën e ashpër politike

Lajme

Gazeta Express

13/04/2026 11:47

Vatikani ka reaguar pas deklaratave kritike të presidentit amerikan Donald Trump ndaj Papa Leone XIV. Në një postim në rrjetin X, prifti Antonio Spadaro interpreton këtë përplasje si shenjë të një tensioni më të thellë mes pushtetit politik dhe autoritetit moral.

Sipas tij, kur politika sulmon një figurë si Papa, kjo ndodh shpesh sepse nuk arrin ta përballojë atë në të njëjtin terren. Spadaro thekson se Trump nuk po hyn në debat me Leonen, por po kërkon ta tërheqë në një gjuhë që mund të kontrollohet, ndërkohë që Papa flet një “gjuhë tjetër”, të papërkthyeshme në logjikën e forcës apo interesit politik.

Ai e cilëson këtë reagim si një shenjë dobësie, duke argumentuar se përpjekja për ta delegjitimuar një zë moral tregon në vetvete peshën që ai ka. Sipas Spadaro, fakti që Papa përmendet dhe kundërshtohet publikisht është dëshmi se mesazhet e tij kanë ndikim. Në përfundim, ai nënvizon se forca e Kishës qëndron pikërisht në këtë pavarësi: jo si një kundërpushtet, por si një autoritet moral që nuk i nënshtrohet logjikës politike.