Vaksinat kineze nuk i kërkuam, na i sollën vetë turqit! Oferta, në të njëjtën ditë me dhënien e autorizimit - Gazeta Express

Shqiperi

Gazeta Express

13/04/2021 15:31

Vaksinat kineze nuk i kërkuam, na i sollën vetë turqit! Oferta, në të njëjtën ditë me dhënien e autorizimit

Shqiperi

Gazeta Express

13/04/2021 15:31

E habitshme, por me lypsarin më të mirë në botë, Shqipërisë nuk iu desh të bënte asnjë kilometër rrugë për të siguruar kontratën me më shumë se një milion doza vaksine “Coronavac”.

Në të njëjtën ditë kur politika ndryshoi qasje ndaj vaksinave lindore, ka ardhur oferta e parë për të dyndur vendin me vaksina kineze. Dhe jo nga Republika Popullore e Kinës, por nga një kompani turke. Aktet normative që i dhanë dritën jeshile vaksinës së “Sinovac”, që kanë mbërritur dje në Kuvend, citojnë fjalë për fjalë se nuk ishim ne ata që shprehëm interesin për to, por na i sollën.

“Këshilli i Ministrave, me aktin normativ nr. 6, datë 10.03.2021, ka mundësuar dhënien e autorizimit ministrit të Shëndetësisë dhe Mbrojtjes Sociale dhe ministrit të shtetit për Rindërtimin, për zhvillimin e negociatave me prodhuesit, me distributorë të autorizuar, me qeveritë… për të siguruar këto vaksina që janë të certifikuara nga trupa certifikuese në vendin e prodhimit të tyre. Në datën 10.03.2021, Ministria e Shëndetësisë ka marrë një letër ku shprehej interesi nga kompania turke ‘Keymen Ilaç Sanayi ve ticaret’ A. S. për të furnizuar Republikën e Shqipërisë me doza vaksine ‘Coronavac’, të prodhuar në Republikën Popullore të Kinës”.

Qeveria nuk ka pritur gjatë për të shfrytëzuar atë që e cilëson “mundësi të volitshme” dhe i ka kthyer përgjigje pozitive interesit të kompanisë turke, edhe pasi e mësoi që “Coronavac” as i kishte përfunduar të tria fazat e provave klinike. Duke i besuar verbërisht fjalës së turqve, Kryeministri Edi Rama mori udhën për në Stamboll për të nënshkruar marrëveshjen me një milion dozat, 192 mijë nga të cilat mbërritën bashkë me të në Rinas.

SI U BINDËN KOMITETET

Në tetë faqet e aktit normativ, veç të tjerash, shpalosen gjithë orvatjet e komitetet për të marrë informacion shtesë mbi efikasitetin dhe sigurinë që ofron “Coronavac”, por “topi” pasohet nga njëri te tjetri, pa dhënë një përgjigje shteruese. Komiteti i Ekspertëve për imunizimin është mjaftuar me përvojën e shteteve të tjera që e kanë administruar përpara nesh dhe që dy fazat e para klinike janë publikuar në revistën shkencore “Lancet” në 17 nëntor 2020, por pa dhënë asnjë detaj mbi të dhënat.

Komiteti i përkohshëm për infeksionin e përhapur nga koronavirusi ka dhënë “OK” në parim, pa kërkuar asnjë informacion shtesë, ndonëse vaksinat e prodhuara në Kinë apo Rusi kanë aprovimin vetëm nga trupat certifikuese të vendeve të tyre.

Më kërkues e njëherësh profesionalë është shprehur Komiteti i Etikës, i cili gjykon domosdoshmërinë e vaksinave të lejuara nga rregullatorët europianë e amerikanë të barnave si dhe vendeve të tjera prodhuese, por me kushtin që aplikimi në masë të shoqërohet me një “informconsent” ku të sqarohen efektet pozitive dhe ato anësore. Gjë që nuk është parë deri më tani.

“VAKSINA E PRANUESHME”

Ministria e Shëndetësisë është siguruar gjithashtu të marrë përvojën e vendeve që e kishin administruar “Coronavac” me kohë. Jo rastësisht është pyetur Turqia, e cila jo vetëm që e administron vetë, por është ofruar e gatshme ta sjellë edhe në Shqipëri. Vaksina kineze është autorizuar në shtetin turk përmes një lejeje emergjente e quajtur “EUA”, që është dhënë për vaksina, efikasiteti, siguria dhe cilësia e të cilave nuk janë siguruar ende. Studimet që vetë Turqia i ka bërë e shpallin atë “të pranueshme”.

“Si rezultat i vlerësimeve shkencore dhe analizave të kryera në laboratorët e analizës dhe kontrollit të Agjencisë turke të Barnave dhe Pajisjeve Mjekësore, vaksina ishte e pranueshme për t’i dhënë autorizimin e përdorimit urgjent”, citohet në dokument. Duke shtënë në dorë një vaksinë që nuk ka përfunduar të gjitha fazat e provave klinike, Ministria turke e Shëndetësisë ka kryer vetë analiza mbi efikasitetin e vaksinës, e cila çuditërisht është mbi atë të raportuar në media. Jo 83.5% efektive, por 91.25%. Më shumë se dhjetë milionë persona në të gjithë vendin, përfshirë dhe punonjësit shëndetësorë kanë marrë deri më tani dozat e vaksinës kineze.