Unitedi ka kërkuar që ndeshjen e parë të sezonit të ri ta luajë larg “Old Traffordit”

Futboll

Gazeta Express

19/06/2026 18:00

Manchester United ka marrë miratimin e Premierligës për të luajtur ndeshjen e parë të sezonit 2026–27 jashtë “Old Trafford”.

Skuadra e Michael Carrick do të përballet me Hull City në stadiumin “MKM” më 22 gusht, një ndeshje që shënon herën e parë që nga viti 2016 që ata e nisin sezonin me një transfertë.

Sipas raportimeve, arsyeja është rinovimi i madh i fushës në “Old Trafford”, ku për herë të parë në 14 vite po hiqet dhe po rindërtohet plotësisht bari i stadiumit për të përmirësuar drenazhimin e ujit dhe mirëqenien e lojtarëve.

Po ashtu po ndërmerren masa për sigurinë rreth sipërfaqes së fushës, duke zgjatur barin deri në skajet e fushës për një sipërfaqe më të njëtrajtshme në vijat anësore.

Do të vendoset edhe një shtresë mbrojtëse në pjesën me tulla në fund të pjerrësisë së famshme të “Old Trafford”, megjithëse vetë pjerrësia do të mbetet.

Si rezultat i këtyre punimeve, klubi kërkoi që ndeshja e parë në shtëpi e sezonit të luhej jashtë stadiumit, sipas “The Sun”.

Ata kanë rreth dhjetë javë kohë për të përfunduar projektin para ndeshjes ndaj Ipswich Town më 29 gusht.

Fusha ikonike po rindërtohet nga zero për herë të fundit në versionin aktual të “Old Trafford”, pasi klubi po planifikon ndërtimin e një stadiumi të ri gjigant në të ardhmen.

Më herët, në mars të vitit të kaluar, klubi kishte njoftuar plane për një stadium të ri me kapacitet 100,000 vende në zonën e “Old Trafford”, i mbështetur nga Sir Jim Ratcliffe dhe i përshkruar si një projekt “modern dhe revolucionar”.

Arkitekti Norman Foster ka paraqitur konceptet e stadiumit dhe projektit të ri, i cili parashikohet të sjellë përfitime të mëdha ekonomike dhe sociale për Mançesterin dhe më gjerë.

Sipas planeve, projekti mund të gjenerojë miliarda paund në ekonomi, të krijojë dhjetëra mijëra vende pune dhe të tërheqë miliona vizitorë shtesë çdo vit.

Foster e ka përshkruar stadiumin si një “qendër të gjallë të një zone të re të qëndrueshme”, një “qytet të vogël modern” që synon të kthehet në një destinacion global për qytetin e Mançesterit./GazetaExpress/