UEFA dhe FIFA nuk po e konsiderojnë përjashtimin e Izraelit nga garat ndërkombëtare

Futboll

Gazeta Express

30/09/2025 17:22

Izraeli ka qenë subjekt i disa bojkotimeve gjatë dy viteve të fundit pas pushtimit të Rripit të Gazës, i cili ka sjellë masakrimin e mijëra civilëve.

Megjithatë, deri tani nuk do të përballet me masa nga organet drejtuese të futbollit.

Brenda pak muajsh nga pushtimi i Ukrainës, Rusia u përjashtua nga garat evropiane, si në nivel klubesh ashtu edhe kombëtaresh, nga UEFA, ndërsa nuk merr më pjesë as në kompeticionet e FIFA-s, pas një ndalimi të përgjithshëm të vendosur fillimisht nga Komiteti Olimpik.

Kjo ishte reagim ndaj agresionit rus, një konflikt që vazhdon ende.

Së fundmi janë shtuar sugjerimet se UEFA dhe FIFA mund të marrin masa të ngjashme kundër Izraelit këtë sezon, pasi protestat kundër përfshirjes së Izraelit në sport janë në rritje.

Ndikimi më i madh i menjëhershëm do të ishte një ndalim teorik i Maccabi Tel-Aviv, i cili aktualisht po konkurron në Europa League.

Në atë rast, pjesa tjetër e skuadrave do të merrnin një mesatare të rezultateve të fituara ndaj Maccabit në ndeshjet e zhvilluara, ndërsa sfidat e ardhshme do të anuloheshin.

Në Nations League, Izraeli është në një grup me Belgjikën, Francën dhe Italinë.

Megjithatë, “Marca” raporton se UEFA nuk ka thirrur një mbledhje emergjente të komitetit ekzekutiv për të diskutuar një ndalim të futbollit izraelit në garat evropiane.

Peticionet për një gjë të tillë janë përmendur, por çështja nuk ka avancuar më tej.

Ndërkohë, FIFA nuk ka diskutuar asnjë veprim ndaj Izraelit, teksa kombëtarja kërkon të kualifikohet për Kupën e Botës.

Gazeta spanjolle thekson se një ndalim i mundshëm për Izraelin nuk figuron në agjendën e mbledhjes së ardhshme të FIFA-s, duke nënvizuar se marrëdhëniet e ngushta mes presidentit të FIFA-s, Gianni Infantino, dhe ish-presidentit të SHBA-ve, Donald Trump, mund të luajnë rol në këtë qëndrim.

SHBA mbështet Izraelin në aksionet e tij ushtarake, ndërsa Infantino, i cili ka kërkuar t’i afrohet Trumpit para Kupës së Botës 2026 që do të zhvillohet në SHBA, Kanada dhe Meksikë, ka pak gjasa të ndërmarrë hapa që mund të prishin këtë raport.

FIFA madje ka vendosur selinë e Kupës së Botës në Trump Towers në Nju Jork, si dëshmi shtesë e marrëdhënieve të tyre të ngushta./GazetaExpress/