Trump ndërhyn për të ndalur luftimet: Tajlanda dhe Kamboxhia zhvillojnë takim urgjent në Malajzi

Lajme

Gazeta Express

28/07/2025 10:30

Liderët e Kamboxhias dhe Tajlandës kanë mbërritur të hënën në Malajzi për bisedime urgjente të synuara për të siguruar një armëpushim në konfliktin e ashpër kufitar mes tyre.

Reuters raporton se një zyrtar nga Malajzia ka njoftuar se të pranishëm në takim janë edhe ambasadorët e SHBA-së dhe Kinës në Malajzi, ndërsa takimi po mbahet në rezidencën e kryeministrit malajzian Anwar Ibrahim, i cili është edhe kryetar i bllokut rajonal ASEAN.

Kujtojmë se si Tajlanda, ashtu edhe Kamboxhia, akuzojnë njëra-tjetrën për nisjen e luftimeve javën e kaluar dhe më pas për përshkallëzimin e përplasjes me bombardime të rënda artilerie në disa pika përgjatë kufirit të tyre tokësor 817-kilometra, konflikti më vdekjeprurës mes fqinjëve të Azisë Juglindore në më shumë se një dekadë.

Kryeministri kamboxhian Hun Manet ka njoftuar se bisedimet janë bashkëorganizuar nga Malajzia dhe Shtetet e Bashkuara, ndërsa do të marrë pjesë edhe Kina.

“Qëllimi i këtij takimi është arritja e një ‘armëpushimi’ të menjëhershëm, i iniciuar nga Presidenti Donald Trump dhe i pranuar nga kryeministrat e Kamboxhias dhe Tajlandës,” ka shkruar Hun Manet në një postim në X.

Trump tha të dielën se ai beson që si Tajlanda ashtu edhe Kamboxhia duan t’i zgjidhin mosmarrëveshjet e tyre, pasi u kishte bërë të ditur udhëheqësve të të dy vendeve se nuk do të nënshkruante marrëveshje tregtare me ta nëse nuk ndalonin luftimet.