Trump hedh dyshime mbi një përballje Putin-Zelensky, por paralajmëron një takim tjetër

Lajme

Gazeta Express

31/08/2025 17:53

Presidenti amerikan Donald Trump ka hedhur disa dyshime mbi gjasat e një takimi midis presidentit rus Vladimir Putin dhe presidentit ukrainas Volodymyr Zelensky, por ai shprehu besim se një takim trepalësh do të ndodhë.

“Një takim me tre do të ndodhë. Një me dy, nuk e di. Por një me tre do të ndodhë. Por, e dini, ndonjëherë njerëzit nuk janë gati për të”, i tha Trump Daily Caller në një intervistë të zhvilluar në Zyrën Ovale të premten, shkruan CNN.

Pas një takimi me Putinin në Alaskë dhe pritjes së Zelenskyt dhe liderëve europianë në Shtëpinë e Bardhë më herët këtë muaj, Trump tha se kishte filluar ta organizonte një takim dypalësh midis Putinit dhe Zelenskyt si hapin e ardhshëm drejt arritjes së paqes.

Por Putini nuk ka dhënë shenja se është i gatshëm të ulet në tavolinë me Zelenskyn. Vetëm disa ditë më parë, Rusia nisi sulmin e saj të dytë më të madh ajror të luftës kundër Ukrainës, duke vrarë të paktën 25 njerëz dhe duke dëmtuar ndërtesa që i përkisnin Këshillit Europian dhe Këshillit Britanik, si dhe disa pallate banimi.