Gjiganti japonez për prodhimin e veturave, Toyota, do t’i largojë nga tregu amerikan 700 mijë vetura Toyta dhe Lexus për shkak të problemeve në pompën e karburantit.

“Nëse vetura bllokohet gjatë vozitjes në shpejtësi të madhe, kjo mund ta rrisë rrezikun për aksident”, thuhet në njoftimin e kësaj kompanie.

Kompania njoftoi se është duke e hetuar këtë problem dhe kur të arrihet një zgjidhje, do t’i njoftojë pronarët përmes postës elektronike në mesin e muajit mars.

Në mesin e modeleve që duhet të tërhiqen nga tregu janë Toyota 4Runner, Toyota Land Cruiser, Toyota Tacoma, Toyota Corolla dhe Toyota Tundra.

Përpos modeleve Toyota, nga tregu do të tërhiqen edhe veturat e tipit Lexus, përfshirë modelet Lexus LS 500, Lexus LC 500, Lexus RC 350 dhe Lexus GS 350, shkruan “CNN”, transmeton Gazeta Express.