Tomë Gashi: Është paraqitur një person që ka njohuri për vrasjen e Astrit Deharit

Gazeta Express

21/10/2020 13:07

Përfaqësuesi i familjes Dehari, Tomë Gashi, në një paraqitje me prindërit e Astrit Deharit tha se në zyrën e tij janë paraqitur edhe disa persona rreth rastit të vdekjes së aktivistit të Vetëvendosjes. Ai tha se është paraqitur edhe një avokat i cili ka qenë prezent në ditën kritike në Qendrën e Paraburgimit në Prizren.

“Ai ka deklaruar, po ashtu se ka qenë jashtëzakonisht i frikësuar që ka pasë gjëra jo të zakonshme”, tha Gashi, raporton Gazeta Express.

Ai shtoi se është edhe një person tjetër që është paraqitur dhe që ka njohuri, sipas tij, të jashtëzakonshme rreth vrasjes së Astrit Deharit.

Gashi, po ashtu, shtoi se Prokuroria e ka mbajtur të fshehtë se dy javë më parë është bërë një rikonstruim i vendit ku ka ndodhur vrasja e Astrit Deharit.

Avni Dehari, babai aktivistit të Vetëvendosjes, Astrit Dehari, tha se janë bërë 4 vjet që nga vrasja e djalit të tij dhe, sipas tij, janë bërë shumë manipulime e prapaskena. /Express/

Ai thotë se kanë qenë të detyruar të kërkojnë drejtësi jashtë Kosovës. Ai thotë se prokurori që ka qenë në Prizren e ka zvarritur këtë punë. /Express/