Tiranë/ Dy të arrestuar për të shtënat në Kombinat, policia: 28-vjeçari qëlloi ndaj automjetit të personave që u konfliktua

Shqiperi

Gazeta Express

23/08/2025 10:00

Oltjon Asllani, 28-vjeçar, u shfaq në një pamje të pazakontë një ditë më parë në zonën e Kombinatit në Tiranë: Me një kallash në dorë. I riu që njihet edhe me mbiemrin Vodollari, u arrestua nga policia, e cila e zbuloi këtë episod nga kamerat e sigurisë.

Më herët, 28-vjeçari ishte dhunuar fizikisht nga 4 persona. Pas këtij konflikti, ai mori armën, dhe i shoqëruar në makinë nga shoku i tij 30-vjeçari Serxho Bajza, edhe ky i arrestuar, nisi të qëllojë me kalash ndaj makinës ku lëviznin 2 nga personat me të cilët ishin zënë.

Sipas policisë, askush nuk u lëndua, por vetëm dëme materiale në automjetin e qëlluar. Në një moment, Oltjon Asllani, i veshur me bluzë të zezë e pantallona të bardha, del nga makina duke mbajtur kallashin në dorë.

Në pamjet e kamerave të sigurisë teksa ai qëllonte në drejtim të makinës, shfaqet edhe një punëtor, i cili fatmirësisht i ka shpëtuar plumbave. Pasi u larguan, 2 të rinjtë i hoqën targat makinës, në përpjekje për të humbur gjurmët, por u gjet në periferi të Tiranës.

Përveç tyre, policia po heton në gjendje të lirë edhe 4 personat e përfshirë në konfliktin fizik paraprak me dy të arrestuarit, që pasoi edhe përdorimin e armës.

“Në vijim të veprimeve hetimore për ngjarjen e ndodhur ditën e djeshme, rreth orës 12:10, në Kombinat, ku u qëllua me armë zjarri në drejtim të automjetit me të cilin lëviznin shtetasit R. K., 38 vjeç, dhe Zh. K., specialistët për Hetimin e Krimeve të Rënda, në bashkëpunim me Forcat Operacionale të DVP Tiranë dhe me Komisariatin e Policisë Nr. 6, në kuadër të operacionit “Quick Response”, kapën dhe vunë në pranga shtetasit:
    •    O. A(V)., 28 vjeç
    •    S. B., 30 vjeç, të dy banues në Kombinat

Gjithashtu, u proceduan penalisht shtetasit R. K., Zh. K., F. K. dhe B. M.

Nga hetimet paraprake ka rezultuar se 4 shtetasit e proceduar penalisht janë konfliktuar fizikisht me 2 autorët e ngjarjes. Pas konfliktit, për motive të dobëta, shtetasi O. A(V). ka qëlluar me armë zjarri në drejtim të automjetit të 38-vjeçarit, ndërsa shtetasi S. B. drejtonte automjetin nga ku qëlloi me armë zjarri 28-vjeçari.”, njofton policia.