Thomas Partey prapë në telashe, sot nis procedimi për akuza të reja të përdhunimit

Futboll

Gazeta Express

12/02/2026 15:16

Ish-mesfushori i Arsenalit, Thomas Partey (32 vjeç), është përballur sot me dy akuza të reja për përdhunim në Gjykatën e Magjistraturës në Westminster, Londër.

Akuzat e reja janë shtuar nga Crown Prosecution Service (CPS) pas një hetimi të zgjeruar nga Metropolitan Police dhe lidhen me akuza të pretenduara nga një gruaja e katërt, sipas deklaratave zyrtare të prokurorisë.

Thomas Partey ishte më herët nën akuzë për pesë vepra të përdhunimit dhe një sulm seksual, të cilat dyshohet se kanë ndodhur midis viteve 2021 dhe 2022 dhe për të cilat ai është deklaruar i pafajshëm.

Gjykimi i tij mbi këto akuza fillestare është caktuar të zhvillohet më 2 nëntor 2026.

Aktualisht ai është liruar me kusht deri në procese të mëtejshme dhe duhet të njoftojë policinë për çdo udhëtim jashtë vendit 24 orë para se të udhëtojë, dhe nuk mund të kontaktojë asnjë nga ankuestaret nën kushtet e lirimit me kusht.

Partey ka luajtur në Premier League me Arsenalin deri në qershor të vitit 2025, kur kontrata e tij skadoi, dhe pas largimit të tij nga klubi ai u transferua te Villarreal në Spanjë, ku vazhdon karrierën e tij futbollistike edhe nën këto kushte ligjore.

Në total, me akuzat e reja numri i personave që kanë ngritur pretendime kundër tij është rritur në katër gra të ndryshme, sipas hetimeve dhe autorizimeve të prokurorisë.

Ai do të dalë para gjykatës sërish më 13 mars për masat e reja të paraqitura ndaj tij. /Gazeta Express