The Times: SHBA-ja dhe Rusia propozojnë zgjidhje për Ukrainën sipas modelit të Bregut Perëndimor nën pushtimin izraelit

Lajme

Gazeta Express

13/08/2025 17:53

Rusia dhe Shtetet e Bashkuara e kanë diskutuar pushtimin e Bregut Perëndimor nga Izraeli si një model për t’i dhënë fund luftës në Ukrainë, sipas gazetës The Times, transmeton Gazeta Express.

Sipas këtij skenari, Rusia do të kishte kontroll ushtarak dhe ekonomik mbi Ukrainën e pushtuar nën organin e vet qeverisës, duke imituar sundimin de facto të Izraelit mbi territorin palestinez të sekuestruar nga Jordania në vitin 1967.

Ky medium raporton se ideja u hodh javë më parë në diskutimet midis Steve Witkoff, të dërguarit të paqes të Presidentit Trump, dhe homologëve të tij rusë, sipas një burimi pranë këshillit të sigurisë kombëtare të SHBA-së.

Witkoff, i cili është ngarkuar gjithashtu nga Trump me detyrën për të sjellë paqe në Lindjen e Mesme, kuptohet se e mbështet idenë, të cilën amerikanët besojnë se anashkalon barrierat në kushtetutën ukrainase për të heqë dorë nga territori pa mbajtur një referendum “gjithë-ukrainas”.

Presidenti ukrainas Zelensky ka refuzuar të pranojë të japë territor, por modeli i pushtimit mund të jetë një mekanizëm për të lejuar një armëpushim pas tre vitesh e gjysmë lufte.

Sipas modelit, kufijtë e Ukrainës nuk do të ndryshojnë, ashtu siç kufijtë e Bregut Perëndimor kanë mbetur të pandryshuar për 58 vjet, vetëm nën kontrollin izraelit.

Shtëpisë së Bardhë i është kërkuar koment.

“Do të jetë sikur Izraeli të pushtojë Bregun Perëndimor”, tha burimi për The Times para samitit të Trump me presidentin Putin në Alaska të premten.

“Me një guvernator, me një situatë ekonomike që shkon në Rusi, jo në Ukrainë. Por do të jetë ende Ukraina, sepse … Ukraina nuk do të heqë dorë kurrë nga sovraniteti i saj. Por realiteti është se do të jetë territor i pushtuar dhe modeli është Palestina”.

Pushtimi i Izraelit është shpallur i paligjshëm nga Gjykata Ndërkombëtare e Drejtësisë, e cila nuk njihet nga SHBA-të dhe pranohet vetëm pjesërisht nga Rusia.

Në mars të vitit 2022, gjykata urdhëroi Rusinë të “pezullojë menjëherë operacionet ushtarake” në Ukrainë, me një votim prej 13 votash pro dhe dy kundër, ku gjyqtarët rusë dhe kinezë ishin kundër. Urdhri është i detyrueshëm për Rusinë, por gjykata nuk ka mjete për ta zbatuar atë.

Kombet e Bashkuara i kanë urdhëruar Izraelit të përfundojë pushtimin e tij, së fundmi në një votim të asamblesë së përgjithshme shtatorin e kaluar nga 124 vende me 14 kundër, me 43 abstenime.