Telefoni i preferuar i vitit rezulton të jetë shumë më i lirë nga sa mendohet

AutoTech

Gazeta Express

26/12/2025 20:30

Viti 2025 ka qenë një vit i fortë për telefonat inteligjentë.

Modelet kryesore kanë lënë përshtypje të mëdha: Samsung Galaxy S25 Ultra, i mbushur me funksione, e nisi vitin fuqishëm; iPhone 17 Pro u dallua me dizajnin e tij portokalli të guximshëm; OnePlus 15 mahniti me baterinë që zgjat deri në tre ditë; ndërsa Honor Magic V5 tërhoqi vëmendjen me trupin e tij jashtëzakonisht të hollë dhe palosës.

Megjithatë, kur erdhi momenti për të zgjedhur telefonin e preferuar të vitit, zgjedhja ra mbi një pajisje shumë më të thjeshtë dhe më të lirë: Google Pixel 9a. Në redaksinë e Express.co.uk shpesh vërehen komente nën recensionet e telefonave më të shtrenjtë, ku lexuesit shprehin habinë që çmimet kalojnë 1,000 paundë. Është e kuptueshme që këta “kompjuterë xhepi” të nivelit të lartë janë përtej buxhetit të shumicës së njerëzve.

Kjo ka shtuar vlerësimin për telefonat më të përballueshëm që, megjithatë, ofrojnë përvojë shumë të mirë. Pikërisht për këtë arsye, Google Pixel 9a spikat si zgjedhja e vitit. Me një çmim rreth 585 euro (i konvertuar nga 499 paundë), ai ofron një përvojë pothuajse identike me Pixel 10 Pro që kushton rreth 1,170 euro, dhe është përdorur gjerësisht si telefoni kryesor.

Për më tepër, Pixel 9a gjendet shpesh në oferta, ku çmimi zbret deri në rreth 410 euro (nga 349 paundë), në disa shitës të mëdhenj.

Ky është një telefon që ofron më shumë sesa sugjerojnë specifikat e tij. Pixel 9a nuk ka ekranin më të mirë, as kamerat më të avancuara, as baterinë më jetëgjatë apo dizajnin më luksoz në treg. Por pothuajse çdo element i tij është shumë i mirë, dhe kur këto kombinohen me softuerin e shkëlqyer të Google, rezultati është një paketë pothuajse e plotë – me qindra euro më pak se modelet që reklamohen agresivisht.

Një tjetër aspekt interesant është se Pixel 9a, si një telefon i mesëm për nga çmimi, pamja dhe funksioni, nuk nxit varësi të tepruar nga telefoni. Ai nuk të “tërheq” vazhdimisht për aplikacione që të humbasin kohën. Madje, përdorimi i kufizuar i aplikacioneve duket më i natyrshëm në këtë pajisje, krahasuar me telefonat më të shtrenjtë që psikologjikisht të shtyjnë t’i “justifikosh” paratë e shpenzuara duke i përdorur pa pushim.

Nëse dikush mban në xhep një Samsung Galaxy Z Fold 7 që kushton rreth 2,100 euro (i konvertuar nga 1,799 paundë), lind dëshira për ta përdorur vazhdimisht, ndryshe duket sikur paratë shkojnë dëm. Pixel 9a, përkundrazi, është modest. Edhe në ngjyrë rozë, ai duket thjesht funksional – dhe pikërisht kështu ndihet.

Një detaj i rrallë në botën e telefonave është mungesa e “daljes” së kamerës. Pixel 9a ka një pjesë të pasme të sheshtë, gjë që mund të heqë nga identiteti vizual i Pixel-ëve të fundit, por shton thjeshtësinë. Kamerat janë shumë të mira për përdorim të përditshëm, edhe pse mungon lentja telefoto. Zoom-i ndonjëherë mungon, por kamera kryesore është aq e mirë për fotografi të shpejta sa kjo nuk bëhet problem serioz.

Sa i përket baterisë, ndonëse modele si OnePlus 15 tregojnë se tre ditë autonomi janë të mundshme, Pixel 9a arrin lehtësisht dy ditë përdorimi real. Algoritmi adaptiv i baterisë i Google ka dhënë rezultate të dukshme, duke përmirësuar ndjeshëm jetëgjatësinë me kalimin e kohës, pasi telefoni mëson zakonet e përdoruesit.

Softueri inteligjent shfaqet edhe në detaje të tjera: nëse është vendosur alarmi i mëngjesit, telefoni karikohet më ngadalë gjatë natës për të arritur 100% pikërisht në momentin e zgjimit, pa dëmtuar baterinë nga mbingarkesa. Një tjetër plus i rëndësishëm është se Pixel 9a nuk përfshin disa nga funksionet më agresive të inteligjencës artificiale që gjenden në modelet më të shtrenjta Pixel 9 dhe Pixel 10. Për shumëkënd, kjo është një gjë pozitive, pasi shmangen njoftimet automatike dhe mjetet AI që shpesh bëhen bezdisëse.

Pixel 9a është një telefon për njerëz normalë, me nevoja normale dhe buxhete normale – pra, për shumicën dërrmuese. Kompanitë e telefonave kanë krijuar idenë se të gjithë kemi nevojë për iPhone-in më të shtrenjtë, Pixel-in më luksoz apo Galaxy-n më të sofistikuar. Por nëse dikush duhet të paguajë rreth 58 euro në muaj për dy vite (i konvertuar nga 50 paundë) për të marrë një telefon, ndoshta nuk është marrëveshja më e mirë.

Me një çmim rreth 585 euro, Google Pixel 9a është një blerje shumë e mirë. Me ofertën rreth 410 euro, bëhet një super-ofertë që mund të blihet edhe pa kontratë afatgjatë. Me një mbrojtëse dhe pak kujdes për baterinë, ky telefon ka potencialin të zgjasë për vite me radhë. /GazetaExpress/