Teherani: Udhëheqësi i ri suprem nuk shfaqet për arsye sigurie, por është gëzon shëndet të plotë

Lajme

Gazeta Express

27/03/2026 14:17

Udhëheqësi i ri suprem i Iranit, Mojtaba Khamenei, është në gjendje të mirë shëndetësore dhe vijon të drejtojë vendin, pavarësisht mungesës së tij në publik, e cila sipas zyrtarëve lidhet me arsye sigurie.

Deklarata u bë të premten nga Ali Bahreini, përfaqësues i Iranit në zyrën e Kombeve të Bashkuara në Gjenevë. Ai theksoi se mungesa e liderit në jetën publike është pasojë e “masave të shtuara të sigurisë për shkak të rrethanave të veçanta aktuale”.

“ Ai është plotësisht i shëndetshëm dhe vazhdon të udhëheqë vendin”, u shpreh Bahreini, sipas mediave shtetërore iraniane.

Mungesë në publik pas vrasjes së Khameneit

Mojtaba Khamenei nuk është shfaqur publikisht që nga muaji i kaluar, kur babai i tij dhe ish-udhëheqësi suprem, Ali Khamenei, u vra gjatë sulmeve të përbashkëta të SHBA-së dhe Izraelit. Që prej asaj kohe, ai ka komunikuar vetëm përmes deklaratave me shkrim.

Raportime për lëndime të lehta

Më herët gjatë këtij muaji, burime të afërta me situatën kishin bërë të ditur se lideri 56-vjeçar kishte pësuar një thyerje në këmbë dhe lëndime të tjera të lehta në ditën e parë të fushatës së bombardimeve nga SHBA dhe Izraeli.

Sipas të njëjtave burime, përveç dëmtimit në këmbë, ai kishte marrë edhe një mavijosje rreth syrit të majtë si dhe gërvishtje të lehta në fytyrë.

Megjithatë, autoritetet iraniane këmbëngulin se gjendja e tij shëndetësore është e mirë dhe se ai vijon të ushtrojë normalisht funksionet si lider i vendit.