Të shtëna me armë në Prizren, plagoset një person – I dyshuari paraqitet në polici

Lajme

Gazeta Express

30/08/2025 22:50

Një person ka mbetur sot i plagosur në Prizren për shkak të të shtënave me armë.

Kjo është bërë e ditur për Gazetën Express nga zëdhënësi i Policisë së Kosovës për rajonin e Prizrenit, Shaqir Bytyqi.

Nga policia është bërë e ditur se për të shtënat është raportuar rreth orës 18:00, ndërsa pak minuta më vonë viktima 29-vjeçar ka kërkuar ndihmë në Emergjencën e Spitalit.

Po ashtu, policia ka bërë të ditur se lidhur me rastin është paraqitur në polici edhe i dyshuari V.S 24-vjeç.

”Policia më datë 30.08.2025, rreth orës 18:00, ka pranuar informacion për të shtëna me armë zjarri në rrugën “Ismet Jashari”, në Prizren.

Rreth orës 18:12, nga Emergjenca e Spitalit është njoftuar se një person kishte kërkuar ndihmë mjekësore si pasojë e plagosjes nga arma e zjarrit. Viktima, Z.B., mashkull 29 vjeç, ka pësuar plagë në këmbën e majtë dhe sipas mjekut gjendja e tij është stabile.

I dyshuari, V.S., mashkull 24 vjeç, me ftesë të Policisë është paraqitur në Stacionin Policor rreth orës 19:20.

Njësitë përkatëse policore kanë dalë menjëherë në vendngjarje dhe janë duke ndërmarrë të gjitha veprimet e nevojshme hetimore. Lidhur me rastin, procedurat e mëtejshme po zhvillohen në koordinim me Prokurorin e Shtetit”, thuhet në përgjigjen e Policisë. /GazetaExpress