Të paktën tetë të vrarë dhe qindra të plagosur ndërsa protestuesit në Kenia përleshen me policinë

Lajme

Gazeta Express

25/06/2025 21:52

Të paktën tetë persona janë vrarë dhe 400 të tjerë janë plagosur, ndërsa mijëra njerëz dolën në rrugë në një ditë protestash në të gjithë Kenian kundër qeverisë së Presidentit William Ruto, ka raportuar BBC, transmeton Gazeta Express.

Policia u përlesh me protestuesit në kryeqytetin Nairobi dhe qytete të tjera, saktësisht një vit pas valës së demonstratave vdekjeprurëse antiqeveritare që goditën kombin në vitin 2024.

Shumë prej atyre që demonstruan brohoritën “Ruto duhet të ikë” dhe tundnin degë si simbol të kundërshtimit paqësor ndaj qeverisjes të tij.

Qeveria ndaloi mbulimin e drejtpërdrejtë televiziv dhe radiofonik të protestave, por dekreti i saj u rrëzua nga Gjykata e Lartë në kryeqytet, Nairobi.

Ruto u bëri thirrje protestuesve të mos kërcënojnë paqen dhe stabilitetin, ndërsa turmat u përpoqën të arrinin në rezidencën e tij zyrtare, por u shtynë nga policia.

“Protestat nuk duhet të jenë për të shkatërruar paqen në Kenia. Ne nuk kemi një vend tjetër ku të shkojmë kur gjërat shkojnë keq. Është përgjegjësia jonë ta mbajmë vendin tonë të sigurt”, tha ai.

Presidenti po fliste në një ceremoni varrimi në qarkun bregdetar të Kilifi.

Mungesa e tij nga Shtëpia e Shtetit, rezidenca e tij zyrtare, ishte e dukshme, pasi protestues të rinj kërcënuan ta sulmonin atë.