Taylor Swift e përmend Real Madridin në këngën e saj të re

Futboll

Gazeta Express

03/10/2025 18:00

Çdo lëvizje e Taylor Swift analizohet nga mediat, dhe pasi përmendi Real Madridin, nuk është surprizë që superylli amerikan ka bërë bujë edhe në Spanjë.

35-vjeçarja nga Pennsylvania ka përmendur gjigantin spanjoll në këngën e saj më të re, shkruan “Gazeta Express”.

Departamenti i marketingut në “Santiago Bernabéu” me siguri është i kënaqur që Swift ka përmendur Real Madridin, gjë që siguron një lidhje të fortë të markës me një nga emrat më të mëdhenj të muzikës botërore.

Vargu “They want a contract with Real Madrid” shfaqet në këngën e saj më të fundit “Wi$h Li$t”, e cila përshkruan dëshirën popullore për famë dhe luks.

Vetë Swift, në anën tjetër, duket e lumtur vetëm me yllin e NFL, Travis Kelce – të paktën ky është personi për të cilin supozohet se po këndon.

Tifozët e Real Madridit që janë gjithashtu “Swifties” do të jenë padyshim të lumtur me këtë zhvillim, ndonëse përkrahësit e Barcelonës dhe Atletico Madrid që kanë dobësi për këngëtaren mund ta shohin këtë me një sy tjetër.

Ky është vazhdim i lidhjes së Real Madridit me Swift, pasi ajo performoi dy netë në “Santiago Bernabéu” në maj të vitit 2024.

Koncertet e saj ishin ngjarje madhore në kryeqytetin spanjoll, megjithatë Real Madridi ka vuajtur pasojat që prej atëherë.

Zhurma e shkaktuar nga këto koncerte – dhe të tjera – ka bërë që “Bernabéu” të ndalohet përkohësisht nga organizimi i koncerteve, pasi është gjetur në shkelje të rregulloreve mjedisore.

Klubi ka nisur të kërkojë zgjidhje, përfshirë izolimin e plotë akustik të stadiumit, por ende nuk ka arritur një zgjidhje përfundimtare.

Ndërkohë, Atletico Madrid ka përfituar, duke siguruar një numër të madh koncertesh të artistëve të mëdhenj.

Kulmi pritet të jetë në vitin 2026, kur Bad Bunny do të mbajë 12 netë koncertesh në “Metropolitano”./GazetaExpress/