Taulant Hodaj godet FFK-në dhe konfirmon dorëheqjen

Futboll

Gazeta Express

14/03/2025 15:41

Avokati dhe përfaqësuesi juridik i Federatës së Futbollit të Kosovës, Taulant Hodaj, ka njoftuar sot përfundimin e bashkëpunimit të tij me institucionin më të lartë të futbollit në Kosovë.

Në një komunikatë në llogarinë e tij në Facebook, Hodaj shprehu keqardhjen për këtë vendim, por njëkohësisht theksoi se ai erdhi si pasojë e praktikave të përsëritura të FFK-së, të cilat, sipas tij, kanë qenë në kundërshtim me parimet e tij profesionale.

Në veçanti, ai përmendi pengesat dhe qasjet e ndryshme të FFK-së lidhur me përfaqësimin e Kosovës në rastin e hapur në Gjykatën e Arbitrazhit Sportiv (CAS) kundër Rumanisë. Sipas tij, kjo qasje mund të dëmtojë shanset e Kosovës për të fituar rastin dhe për të mbrojtur të drejtat e futbollistëve dhe ekipit kombëtar.

“Besoj se kjo qasje e FFK-së do të dëmtojë shanset e Kosovës për të fituar rastin dhe për të mbrojtur të drejtat dhe reputacionin e futbollistëve dhe ekipit kombëtar,” deklaroi Hodaj.

Pavarësisht largimit të tij nga FFK-ja, Hodaj theksoi se do të vazhdojë të jetë përkrah futbollistëve, klubeve dhe lojtarëve të Kombëtares së Kosovës në cilësinë e tij si avokat dhe ekspert ligjor.

“Kosova ka një potencial të jashtëzakonshëm në futboll – lojtarë të talentuar, klube të përkushtuara dhe një staf brenda FFK-së që punon me pasion. Ka qenë një privilegj dhe kënaqësi të bashkëpunoj me ta,” shtoi ai.

Në përfundim, Hodaj shprehu shpresën që Federata e Futbollit të Kosovës të vazhdojë të rritet dhe të forcojë kapacitetet e saj, në mënyrë që futbolli kosovar të arrijë sukseset që meriton në arenën ndërkombëtare.