Tarifat e reja gjithëpërfshirëse të Trump kanë hyrë sot në fuqi

Lajme

Gazeta Express

07/08/2025 8:00

Tarifat e reja gjithëpërfshirëse të Presidentit të SHBA-së, Donald Trump, ndaj dhjetëra vendeve anembanë botës kanë hyrë në fuqi.

“ËSHTË MESNATA!!! MILIARDË DOLLARË NË TARIFAT PO RRJEDHIN TANI NË SHTETET E BASHKUARA TË AMERIKËS!”, tha Trump në mediat sociale pak minuta para afatit të mesnatës në Uashington, DC.

Më parë, presidenti e goditi Indinë me një tarifë prej 50%, e cila do të hyjë në fuqi më 27 gusht, përveç nëse ajo ndalon blerjen e naftës ruse.

Trump kërcënoi gjithashtu me një tarifë 100% mbi çipat kompjuterikë të prodhuar jashtë vendit, ndërsa i shtyn firmat e teknologjisë të investojnë në SHBA. Kjo ndodhi ndërsa Apple njoftoi një investim të ri prej 100 miliardë dollarësh në SHBA, pasi u vu nën presion nga Shtëpia e Bardhë për të zhvendosur më shumë prodhim në Amerikë.

Javën e kaluar, administrata Trump njoftoi një listë të rishikuar të taksave të importit për dhjetëra partnerë tregtarë dhe zgjati një afat për vendet që të arrijnë marrëveshje me SHBA-në deri më 7 gusht. Vendet kanë nxituar për të arritur marrëveshje me Uashingtonin për të ulur, ose hequr, atë që Trump e quan “tarifa reciproke”.

Politikat e tij tregtare synojnë riformësimin e sistemit global tregtar, të cilin ai e sheh si trajtim të padrejtë të SHBA-së. Ekonomitë e varura nga eksportet në Azinë Juglindore ishin ndër më të goditurat nga tarifat e reja, shkruan BBC.

Laosi dhe Mianmari, të përqendruara në prodhim, u përballën me disa nga taksat më të larta me 40%. Disa ekspertë thanë se Trump duket se ka synuar vendet me lidhje të ngushta tregtare me Kinën. Disa ekonomi të mëdha – përfshirë Mbretërinë e Bashkuar , Japoninë dhe Korenë e Jugut – kanë arritur tashmë marrëveshje për të marrë tarifa më të ulëta nga ato që kërcënoi Trump në prill.

Bashkimi Evropian ka arritur gjithashtu një marrëveshje kornizë me Uashingtonin, në të cilën Brukseli ka pranuar një tarifë prej 15% për mallrat nga blloku tregtar. Tajvanit, një aleat kyç i Uashingtonit në Azi, iu dha një tarifë prej 20%. Presidenti i saj Lai Ching-te tha se norma është “e përkohshme” dhe se bisedimet me SHBA-në janë ende duke u zhvilluar.

Javën e kaluar, Trump rriti normën e tarifave ndaj Kanadasë nga 25% në 35%, duke thënë se vendi kishte “dështuar të bashkëpunonte” në frenimin e rrjedhës së fentanilit dhe drogave të tjera përtej kufirit të SHBA-së. Qeveria kanadeze thotë se po merr masa të ashpra kundër bandave të drogës.

Por shumica e eksporteve kanadeze në SHBA do t’i shmangen taksës së importit për shkak të një traktati tregtar ekzistues, Marrëveshjes Shtetet e Bashkuara-Meksikë-Kanada (USMCA). Tarifat më të larta ndaj Meksikës u pezulluan për 90 ditë të tjera, ndërsa negociatat vazhdojnë për të arritur një marrëveshje tregtare.

Të mërkurën, Trump tha se do të vendoste një tarifë 100% për gjysmëpërçuesit e prodhuar jashtë vendit. Prodhuesit kryesorë të çipave që kanë bërë investime të konsiderueshme në SHBA duket se i kanë shmangur tarifës së re. Zyrtarët qeveritarë në Tajvan dhe Korenë e Jugut kanë thënë në deklarata të ndara se TSMC, SK Hynix dhe Samsung do të përjashtohen nga taksa e re.

Gjithashtu të mërkurën, Trump e rriti tarifën totale ndaj Indisë në 50%, ndërsa i bën presion importuesit të tretë më të madh të energjisë në botë që të ndalojë blerjen e naftës nga Rusia. Nju Delhi e ka quajtur këtë veprim “të padrejtë, të pajustifikuar dhe të paarsyeshëm” dhe është zotuar të mbrojë interesat e saj kombëtare.

Eksportet e Brazilit në SHBA përballen gjithashtu me një tarifë prej 50%. Trump e vendosi taksën pasi akuzoi Presidentin Luiz Inacio Lula da Silva për sulm të padrejtë të firmave të teknologjisë amerikane dhe e quajti ndjekjen penale të ish-Presidentit Jair Bolsonaro për gjoja përpjekje për grusht shteti një “gjueti shtrigash”.

SHBA-të dhe Kina kanë zhvilluar një sërë bisedimesh, ndërsa janë përpjekur të bien dakord për një zgjatje të një pauze 90-ditore të tarifave që do të skadojë më 12 gusht.